گلیلیو: ( نا امیدیا گوں ) جواں‘ جواں۔
رجسٹرار:تہ وثی ہماں قطب نما ڈولیں زبردستیں چیزے پچے نہ ٹاہینئے کہ بغر ژہ ریاضی علما سدھائیں لکیرکشتہ کاتکنت۔ ہماں باز کار ی ایں چیز ے اث۔
گلیلیو: ہماں تہ چکّانی لیو ی چیزے۔
رجسٹرار: ہماں چیزا تہ رپبلکئے کلاں ژہ مزائیں مڑد وہش کثغثنت۔ او زردِہ کٹثغثی او تہ گشئے کہ چکی لیوے اث۔
گلیلیو:ہا‘یک معجزہ اے اث۔ پرولی۔ تہ مناں گنڑتیا جثہ گوئر مں نواں کہ پرشما چیزے لبھی۔(آں کاغذے زیری کہ آنہی چکا نقشہ کشتی ایں)۔
رجسٹرار:جائی؟(آں کڑوبی جکی)۔استاد گیلیلی!ما کل سئی اوں کہ تہ یک مزنیں انسانے یئے ، بلے بے تسلی ایں مڑدے یئے۔ پر ‘مں ہر وخت گوئشتہ کہ تہ مزنیں انسانے یئے۔
گلیلیو:ہا‘ مں ضرور بے تسلی آں‘ صبر کنوخے نہ یاں۔ او اغر ترا عقلے بیثیں تہ تہ مئیں ہمے صفتئے قدر کث مناں زر داث۔ پچیکہ دانڑتی دہ ہر چی کہ مں کثہ ہمانہی سرا مناں تسلی نَیں۔ مں منّاں کہ او وینس ئے اشرافیں مڑدماں! ہر وختیکہ مں شمئے ہتھیار جاہاں، پورٹاں او تو پانی کارخانہانی اندرا وثی قیمتہ وصول کنغہ گنداں تو مناں کندغ کیث۔ بلے وثی اصلیں سرحالا پہ گوئر مں وخت تامیں؟۔۔۔۔ دِیر دیرا دہ پجو خیں خیال کہ منی دماغہ سرا مچی ءَ کن انت، آں چہ وختا در کفنت شوں درکفنت ، شما تہ ہماں کاریغرا لنگھڑاں گوں کُشغائیں آں کہ داناں گوئٹثہ کنت۔مں چل و شش سالئے بیثغاں اودانڑتی دَہ ہمنگیں کار کثہ نہ خثوں کہ شمانہیا مئیں دل ساڑت بی۔
رجسٹرار: گڑہ مں تئی کار ہ ماثل نہ خناں۔
گلیلیو: مہربانی ۔
رجسٹرارروث ۔ گلیلیو ساڑتیں ساہی اے کشی۔ آندریا شیشہ آں زڑتیہ کیث
گلیلیو:(کاراکناناں)تہ سوف واڑتہ پچے نہ ؟۔
آندریا:اے خاطرا کہ مں ماثہ ڈساں کہ اے چرّی۔
گلیلیو: آندریا ہمے ٹوکاں درامہ گوئش۔
آندریا: پچے؟۔
گلیلیو:کڑدے حاکمیں مڑدم اشیا وہش نہ خننت۔
آندریا: پر، اے تہ راستیں ٹوکنت۔
گلیلیو:پر، آں وہش نہ خننت۔ دوہمی ٹوکے دِہ استیں ۔ ما فزکس والایاں دانڑتی ہماں چیز ثابت کثہ نہ خثغنت کہ مئے دل گشی حقیقت انت۔ دانڑتی تہ کوپرنیکسہ تعلیم دِہ ثابت نویثغنت۔ آں کل خیال و مفروضہ انت۔شیشہاں مناں دئے۔
آندریا: یک کالدارے کھوڑ نہ یث ۔ مں وثی کوٹ ہموذا گاہ داثو اے آڑتغنت۔
یک وقفہ اے
گلیلیو: تہ بغیر کوٹہ زمستانہ شوں گوازینتہ کنئے؟
گلیلیو نقشہ والائیں کاغذہ چکا شیشہاں ٹاہینی ایرہ کنت۔
آندریا :مفروضہ چے ناں؟۔
گلیلیو: وختیکہ چیزے امکانہ ڈولا منغ بہ بی، بلے حقیقت اِش نے۔ جھلا ٹوکری ٹاھینوخہ دکانا گوئر، فیلس نامیں زالے ئے گوئر مشیں چکے۔ آں چُکا شیرہ داث ، شمانہیا شیر ہ نہ زیری ۔ ہمے یک مفروضہ اے دانکو کہ کسے برو گندی ثبوت مہ خنتی ۔ کہنیں علم زوال بیغیں، نوخیں دانڑتی مفروضہ ایں۔اِستارانی بارہا ما جُوجُو آنی ڈولا اوں، کسترڑواوں۔مئے چم مژاروانت۔ ماتہ استاراں دِہ جوانیہ دیثہ نہ خنوں ۔ کہنیں علم کہ ہزار سالا دَہ مخلوقہ منثنت،نِیں مرغاینت۔ او اے نوخیں ایسٹرانومی ئے علم چھڑو تک و تریوڑ ئے گنڈھ و تروپیں ۔فی الحال ۔
آندریا : بلے تہ ہر چیز مناں ثابت کثو ڈسثہ۔ مں دِہ فزکس زانے بیغا لوٹاں۔
گلیلیو: مناں یقین ایں۔
گلیلیو: ماروشے آ کشوں کارونیں۔ لینز اں ڈس مناں( کھڑکیہ گوئر روث آنہاں وثی دُربینہ ڈولا دیمو دیمیا داری گندی)۔بیا آندریا ، اِشاں گوں گند۔
آندریا: اڑے ے ے۔ ہر چی نزی بیثہ ۔ مں چرچہ گھنٹہ چکا لکھثغیں اکھراں وانتہ کنغاں۔
گلیلیو: ہمے مار پنچ صد کلدار دیائینی۔ہا۔ ہا۔ ہا۔بیثہ بی کہ مار پنچ صد کلدار دست کفی۔
