پہ سنجر بہارئے وش تبیں موسم و کوہ ئے نوانا خبر نہ بوت و آشہ کوہ ئے نو انا اسپتال ئے تہت ئے باہوٹ اَٹ۔
شکرورنائیں سنجر وتی چار براس ئے کسترین اَت ووتی مستریں براس ئے رمگے چارینت۔ دانکہ مکہیں ماسے زندگ و سلامت اَت آئرا دنیا ءِ ہچ گم و گڑتی نہ اَت۔ پسا دو سال ساری کوڑہیں دنیا یلہ دات اَت ۔ و وختیکہ شہ ماس ئے ساھگا ہم زبہر بوت گڑا پنچ شش ما ہا پد گِندیت کہ مسترین نشار ئے تب دگہ وڑانت و کسترین نشار ہم آئی دستا دارانت و روچے یک وڑیں حالے وتی لوگو اجہانی گوشاں گوازین اَنت۔ یک شپے ر مگ ئے ہنکینا آرگ و دوشگ و میچینگ ءَ پد نانے وارت و وتی نیا دانی سراوپت تہ پگرے آ کپت کہ داں کدیں من اے وڑ بے جاہ و بے نپادا پہ چنڈے نان او تلے پُچ و پازوار ا براسانی بے زوبگ آ شوانگ بین و منا پہ و تا گس او جاہ و مال و ہنکین یے جوڑ کنگی انت۔ گوربا ما براس آت کہ پہ شیوان ءَ پادے کنین تہ گندیت کہ نپاد ہورک انت ۔ دلا گشتے بلکیں پہ آپ دستے ءَ شتہ کیئت بلیں تا سُہب ئے رژنائی و روچ ئے ٹِکّا سنجرپدی نیات او کس آ نزانت کہ شگرابا شت یا مگربا۔
نیمروچا برپی ئے ہنکینا مہمان بوت ۔ حال احوالا پد برپی گشت کہ ورنا اگہ تو منی رمگا چار ینئے گڑا ہرچی کہ وخت وزمانگ ءَ زوبگ رسیت ترا دئیاں و سالا ترا دو جوڑی پُچّ و پاز وار ہم دئیاں۔ سنجر ہمدا شوانگ بوت شاما دیستے کہ برپی ئے ر مگ آنہی جنکّا نودی آورت۔ سوجے کرت کہ نا کو برپی ترا بچ نیست۔۔۔۔۔۔؟ برپی پہ اپسوز گشت نا منا بچک نیست منی است و نیست نودی انت۔ نودی ہم شیرزالیں جنکّے اَت۔ نئے رنگ و صورتا کم ات و نئے کارو کمالا ۔ وخت وتی رپتارا روان اَت و روچ پہ روچا نودی سنجر ئے دلا گیش جاگہ کنان ات آہد و ناک ات کہ کدیں نودی راوتی دل ئے واہگاں سرپد بکنت و اگہ رازی بوت پرائی سانگ بلوٹیت۔ یک شپے ہو رتانی میچنگ ئے وختا نودی و سنجر کہ کمّو نزینک بوتنت تہ سنجر گشت کہ ماہیں نودی من تئی مہراں زِراں و لوٹاں کہ تو منی وابانی بانوری ءَ قبول بکن تہ نودی پہ ترس و لرز گشت۔۔۔۔۔۔ نا موٹو دوارگ چشیں ہبر نکنئے ۔۔۔۔۔۔ سردار دلمانگ انت کہ من آئی نشار ببین و تو وت زانئے کہ منی پیریں پس سردار جواب دات نکنت اگہ جوابے بدنت گڑا سردار منا پہ زور بارت وپہ منی پِسا ہم مال و حال نئیلیت ۔ بلیں سنجر گشت کہ یکبرے تئی سانگا لوٹاں گنداں پد اچے بیت۔۔۔۔۔۔؟ گشتے شر بلوٹ۔۔۔۔۔۔ گڑا سنجر شہ نان و ورگ ءَ پدآچارا کٹینکے پر کرت و گشگا لگّ اِت کہ نا کو برپی یک و نیم سال انت کہ من تئی گِس ئے زھگے اُن منی نیکی ، بدی و است و نیست تئی دیما زاہرانت۔ من دلما نگاں کہ تو منا را زاماس بکن ۔ برچی درائینت کہ تئی ہر گپ بے بدل انت بلیں سردار ہم دلمانگ انت او پہناد پہناد آ من اشکتہ کہ آنودی را وتی نشار کنگ لوٹیت و تو وت زانئے کہ سردار ۔۔۔۔۔۔ گوں ہمے گپاں بر پی ہاموش بوت و سنجر سُہبا پدا ر مگ پہ چارینگا برث۔ ہمے درنیام ءَ ہؤر ہم بوت و کاہ و پوچ باز بوت و سنجرانوں نزینک ءِ کوہانی تہا چارینت و نودی پرائی نیمروچا شہ گِسا نان بُرت۔ تہ یک روچ سردار ئے براسا شہ کوہے ئے شما یکجاہ نان ورگا دیست انت۔
شپا سنجر کہ رمگ گِس ءَ برت تہ سردار ئے پرمان ئے پدا شہ آئی شوانگی لٹ پجگیرگ بوت او سُہبا سنجر زوبگا رستگیں بیست دانگیں ہورت دیما گیت و رہا دگ بوت۔
بہار ئے وستیں شیر گر مے۔ سنجر گوں ائیدو ہوارمال چارینگا انت۔ برے بیرہ آ ائیدورؤت و برے سنجر۔ اے بری سنجر شت کہ دو پریٹا چار سلاہ بندیں مردم سوارت انت آتنت او پہ سنجر سوج اِش کرت کہ کجا انت آئرا آئی براس ئے پیگا مے دئیگی انت۔ ائیدو گشت کہ اے کوہ آ آدستار مگا بیرہ دنت و آدیم پہ آئی رھادگ بوتنت۔ گوں سر بوہگا سنجر ئے دست و پاداِش بست انت ، آئی پونز و گوش اِش بُرّ اِت انت و دور اِش دات کہ چون تو نودی ئے بانوری وتی سالونکی آ واہگدارئے کہ ۔۔۔۔۔۔ نا ۔۔۔۔۔۔ اے تئی سزا انت و و پہ وتی راہا اشت و شت انت۔
تاں دیرا سنجری پد نیا ھگا ائیدو تکا نسر بوت و مشت و چار اِتے تہ گندیت کہ سنجر پلیٹگا انت و پونزو گوشاں زبہر انت۔ دست و پادے دیح کرتنت دگّا آورتے، موٹلے دست دات، سوارے کرت او شہر ئے ہسپتالہ رسینتے۔
نوں سنجر ہسپتال ئے تہت ئے باہوٹ انت و وتی زند ئے منتگیں روچانی گما روچ پہ روچ آپ بوہان انت و ائیدو مپتِ ہدا آمیدگِسا پیشی جنت و آپہ وتی غیر انسانی حرکتا پہر بندنت پرچا کہ آوانی بڈّ ا سردار ئے دست ایر انت۔
