9 دسمبر آ براہوئی ڈیپارٹمنٹ نا نیمہ غان بلوچستان یونیورسٹی ٹی ڈاکٹر لیاقت سنی نا پوسکن شینک مروکا کتاب اونا پی ایچ ڈی نا پٹ پولی نوشت ’’براہوئی شاعری‘‘ و ارٹمیکو کتاب ’’خلیفہ گل محمد نوشکوی کڑد و گشاد‘‘ نا مون پاشی نا دود اڈ تننگا۔
دا مون پاشی نا دیوان نا گچین آ مہمان، پروفیسر ڈاکٹر جاوید اقبال، وائس چانسلر بلوچستان یونیورسٹی ئس۔ داکان بیدس پیشن آن براہوئی، بلوچی و پشتو نا گچین آ پٹ پولکاراک، ادیب و دانشور اک ہرافتیٹی، ڈاکٹر شاہ محمد مری، پروفیسر سیال کاکڑ، قاضی عبدالحمید شہرزاد، وحید زہیر، پروفیسر طاہرہ احساس جتک، غریب شاہ انجم، محمد پناہ بلوچ، نورین بانو و براہوئی ڈیپارٹمنٹ نا کماش شبیر احمد شاہوانی پوسکنا کتاباتا بابت اٹ ہیت گپ کریر۔ ہندن گڈ سر اٹی ڈاکٹر لیاقت سَنی کل مہمان تا منت واری ءِ ہرفے اوفتے تینا پوسکنا کتاباتا ٹیکی تس۔
وائس چانسلر بلوچستان یونیورسٹی پروفیسر جاوید اقبال پارے کہ ۔ ادیب آتا سوب آن، زبان و ادب نا شرحالی نا کاریمک برجا ءُ۔ او براہوئی ڈیپارٹمنٹ نا سینئر آ استاد ڈاکٹر لیاقت سَنی ءِ اونا پوسکن آ کتاب آتا شینکاری آ مبارکبادی ترسا پارے کہ ڈاکٹر لیاقت سنی بلوچستان یونیورسٹی نا استاد آتے کن اسہ چیدہ اسے۔
پروفسیر سیال کاکڑ پارے کہ ڈاکٹر لیاقت سنی نا ’’براہوئی شاعری‘‘ ءِ ای خوڑتی اٹ خواناٹ دا کتاب پٹ پول نا بابت اٹ اسہ پورو ءُ کتاب اسے۔ ہراٹی ڈاکٹر لیاقت سنی نا ہنینا لوزاک براہوئی شاعری ءِ اونا دور آتے اونا کوالخوا انگا شاعر آتے داوڑ سوگو کرینو، ہرا پوسکن آ پٹ پول کروک آتیکن راہشونی نا سوب مریک۔
دیوان آن قاضی عبدالحمید شہرزاد ’’خلیفہ گل محمد نوشکوی کڑد و گشاد‘‘ آ تران کرسا پارے کہ ڈاکٹر لیاقت سَنی اسہ ہندن ءُ شخصیت اسے آ کتاب اس ایس ہرادے ڈکاسر۔ انتئے کہ خلیفہ گل محمد نوشکوی بلوچ ڈغار و بلوچستان آ مروک آ خان سردار، ریاست و دشمن آتا ظلم و زوراکی تے پاش کیک۔
دیوانان وحید زہیر، محمد پناہ بلوچ، پروفیسر طاہرہ احساس جتک، غریب شاہ انجم، نورین بانو اسک ہم تران کریر۔
ہندن براہوئی ڈیپارٹمنٹ نا چیئرمین شبیر شاہوانی، مہمان تا منتواری ءِ ہرفے ۔
دیوان نا گڈسر اٹی ڈاکٹر لیاقت سنی مون پاشی نا دود اٹی بشخ ہلوک آ کل مہمان و کاغد خوانوک آتا منتواری ءِ ہرفسا پارے کہ ہستین برف و یخ انا موسم ءِ، ہال اٹی ادبی بابت داخس باسنی، و مہمان تا گڈ سر اسکان تولنگ براہوئی ادب تون مہر و سنگتی نا ڈس ءِ ایتک۔
دیوان اٹی بلوچستان ادبی فورم نا باسک تنظیم آتیان بیدس، ڈاکٹر شاہ محمد مری، حاجی شاہ بیگ شیدا، حمیرا صدف، بلوچی ڈیپارٹمنٹ بلوچستان یونیورسٹی نا براہوئی ایم فل نا مچ آ اسکالر آتیان بیدس، افضل مراد، رجسٹرار یونیورسٹی طارق جوگیزئی، ٹریژرار جیئند جمالدینی، اسسٹنٹ رجسٹرار ڈاکٹر عالم مینگل، بلوچستان یونیورسٹی خضدار کیمپس نا سروک محمد عالم جتک، اے ڈی بلوچ و اونا ٹیم، ہندن نیاڑی خوانندہ غاتا اسہ بھلو کچ اس ساڑی ئس۔
دیوان نا گڈ سر اٹی ڈاکٹر لیاقت سنی اسٹیج آ تولوک آ مہمان تے پوسکن آ کتاب آتا ٹیکی تس، و ’سوارہ‘ نا بست و بند ہم کننگاسس۔
تورو: ہفت روزہ تلار