من نہ ماناں نہ اِنت ہچ مشکل پہ تو
تو گوں وھداہزار رنگ مٹّات کن ئے
تو چو گْرّانی ئے سبز تاکیں کہیر
باریں چنت رند سبز و گورنڈ بئے
چنت کیّا تئی ساہگا کئیت و روت
کنت منزل ترا
چنت حمل پہ تو سیاہا سنج کنت وتی
شے مرید تبیں عاشقانی دلا چے گوزیت
داگ وتِرکل دینت بند و بوگاں وتی
چینچو چاکر وتی نوبتاں جنت و روت
تو بلے ہانی ئے مٹ و درور نہ بئے
نیکہ تو ہوئے دروریں کاڑے ئے
کہ اپوگانی پندلاں پاشک کن ئے
پہ ترا چنت عومر بہ سگیت
تژن و پیگور بدیں
پہ تئی ہاترا کس شہداد نہ بیت
تو وَ روچے ہزار ماتئے لاڑانی
حقاں جن ئے
باریں تو چنت بالادئے برف آپ کن ئےَ
وش تواریں نلےئے تو شپانکئے دلا
باریں چنت ساربان کنت الہان ترا
تو ہیریگے ئے
پہ تئی ہاترا چینچو لوگ سْتک و شْت
ہو! بلے پہ منی چماں تو کلوپطرائے رنگیں کاڑے ئے
ماہ دروشمیں
دل تئی ہچ وڑاں زیمراں ناچ نہ کنت
