کھسوے ڈْکئے جھوئثوں نوخیں
سنگتیں مڑدم گوش دیاں
گِفتغاں عشقئے چابْکیں زھما
دْبرا گڑداں پھز نیاں
ڈوبرا آسے روکثوں چھوشیں
من چھرگے دڑداں جاہ دیاں
منی لاغریں بْتا بولکے بستیش
اے سانوڑی بشام بنت رِشاں
برائینتو اشتوں جند وثی دستاں
چھوں پھزا ہے ہے من د کھناں
سمبری دڑدےء4 ونڈغا کھسے
ھر دمِ جکاں گوانک جناں
یا ھدا سند کفی بے سریں دڑداں
من تھوروا ں تئی آ سیر نواں
ار جْوفوے لوٹے تھی مناں نیستں
چی ئے من کھڑ کھناں تھر دیاں
لھمتیں ٹھپاں سر بْری گفتا
پھہ گریوغا کھمیں اے د نواں
گفتغیں آسے تھینوغیں جانا
ھڈ منی نیری تِڑکغاں
راستغیں دگاں پوہ نواں جھٹے
چھو سر پھرا ڈیہاں جزغاں
مرض شہ علاجا اْلکہاں کھفتا
چھ حکیماں من د براں
دیئے وثی دستاں چونڈی ے جوری
پہرے آ اژ من دڑد پھِرا ں
ار مناں میچی دھیروے الئے
دڑدی یہ میڑے پھ تھوا کھاراں
بہر کھنے دڑداں گو مناں جھٹے
تئی دلَے چْنڈے من د کفاں
چھڑتا روح منی زہرنیں ٹھوکاں
تئی عشقے شوشوخیں د تفاں
چھْرے لیکثو کَھوری گوئڑتے
اْچھلی پھر من آف وَھاں
جھمبثے چیتری ترونگل بیثو
چھو بدرو بھیرا نوذ رشاں
نہ سوچثے کھمیں چھ رگا کھنغاں
بے اولہو بْڑزیں درشک پْشاں
سمبری دڑدئے بے سریں لہرے
دِھکو ڈولا ونہو کْشاں
چھو نفتے تریٹی درشکے چھکا
درشکئے سوزیں لانبھ شْشاں
