لَٹ خانہ بلوچستان نا ترقی پسند و روشن خیال جُنز(تحریک ) نا داستانے۔ہرانا بنا1950ء آن مس ۔ ہراہندآن دا جُنز نا چشمہ وہنگ ئے بناء کرے ہمو ہند نا پن ’’لٹ خانہ ‘‘ اس:
بھلووخت اسے آن سنگتاک ہندا اُستخوائی نا درشانی ئے کرسہ خواست کننگ اسُر کہ دا جنز (لَٹ خانہ )ہرانا ہیت مدامی مجلس ومچی تیٹ مریک دادے نوشت نا دروشم ٹی اتبو۔ ولے سوج دا اس کہ لَٹ خانہ نا حوالے دیر نوشت نا دروشم ٹی مونا اتے؟ انتئے کہ نوشت آسانو عمل ئس اف و لَٹ خانہ نا تیویٰ حوالے اُست جمی و سرجمی ٹی نوشت اٹ تننگ بھلو ویل ئس اسک ۔ داڑکن کلان مُہٹ سائیں کمال خان شیرانی نا پن ہلنگا ہراکہ دا جنز نا خِشتے تخوکا اسہ مُہکش ئس اسک ۔ ولے سائیں داحوالے نوشت اٹ ہتنگ آن بشخنداری خوایسہ کنے دا کاریمے کننگ کن خواست کرے ۔ سائیں کمال خانان گُڈ ننا دا جنز نا ارٹمی راہشون خواجہ انجم قزلباش اس نن اوڑے خواست کرسہ خن تے بڑز کرین ولے بلوچستان نا پنی آ دا چاہندار ہرانا نوشت اٹ عجبو سوگؤی وزیبداری ئس اسک دا خواجہ ہندنو ناجوڑی سے نا گواچی مس کہ ہراڑن اوقلم ارفنگ و بادوی آن ہنا ۔
انجم قزلباشان گڈ دا کاریمے زَبرووڑاسے ٹی کروکا خواجہ خدائیداد خانے ۔ کنا اُستخوائی ہندااس کہ اوفتا قلم آن داداستان شینک مرے ولے اوہم داحوالے نوشت کننگان بشخنداری خوایس :
گڈسراٹ ای سلیسُٹ و غٹ سنگتاتا ہندا خواست مس کہ ای دا کاریمے سرجمی نا کنڈا دیو۔ ای ہم بھلو نیمون ئس سُجفیٹ تینے ولے نیٹا دا کاریم کن کنا پن پیش تما ۔ ای تو ہچو وڑاسے ٹی داکاریم کن تینے ٹی گشادئس خنپرہ ہنداڑن اِراسال اسکان دا کاریم ٹی دوشاغاتوٹ ولے داسا کنے مجبور کننگ کن ڈاکٹر شاہ محمد مری ڈول و جابرو کمدار ئس کنا زی آ سلفنگانے ۔ ہراتینٹ مشین تا ڈول کاریم کیک ۔ دا بندغ آن نَرنگ کن کنے ہچو گیگ ئس دوبتؤ:
شرفمنداخوانوکاک :داڈول ای لَٹ خانہ نا داستانے نوشتہ کننگ کن رضامند مسونٹ۔ ’’لَٹ خانہ ‘‘ نا باروٹ دُنکہ مالہو ہیت کریٹ کہ دانا بنداؤ 1950ء اٹ تخنگا ۔ داساداجنزے نیم کَرنان زیات وخت تدینے ۔ اوتما ای بیست وہشت نا وئی ٹی اَسُٹ۔ کنا یاداشت اوتما ہم صفتی الو ۔ داسا واہراکہ کنے ٹی دا خس عقلی گشادمرو کہ ای غٹ حوالے چوٹ نا بندآن تننگ کیو۔ تاریخی شون داری ٹی (In Chronological Order) ہمو حالیتے بیان کننگ کنا وس اٹ افک ۔ واہم گڑاس نہ مننگ آن گڑاس مننگ جوانے :
ارٹمی پارہ غا خاص انگا ہیت دا جُنز نا پژدر(پس منظر) ے ۔ یقیناًاو وختا گڑاس ہندنو سبب اسُر کہ ہرافتا پداٹ ’’لَٹ خانہ ‘‘ تحریک اسے نا دروشم ٹی سرہلک و داتحریکے ودی کروکاخواجہ کمال خان شیرانی اس ہرا داجنزئنا پژدرٹی کلان مونی اے :(برجاءِ)
