شاہ عبدالطیف بھٹائی نہ تہنا سندھی زبان و لبزانک و ربیدگئے چہ درستاں مستر و جہگیریں سپاہ (شخصیت) انت بلکیں قول علی نواز وفائی ئے کہ’’ لطیف سندھ اِنت و سندھ لطیف اِنت‘‘۔ آنہی سپاہ و شاعری وتی مزن پہناتی ، فکرئے شاہیگانی وجزبگ و مارشت ئے جہلانکی سوبا میان اسُتمانی لبزانک ئے ہم کچّ وہمدرور انت۔ شاہ عبدالطیف بھٹائی ئے اولی بایوگرافر دیارام گڈوملا وتی کتابGreatest poet of sindh ءَ لافاشاہا را سندھی شاعری ئے حافظ شیرازی گُشانا نبشتگ کہ حافظ ئے شاعری اُلسی زند و جزبگ و مارشت ئے پدرائی و عکس کشی آپیما کُرت نکنت چوشکہ شاہ عبدالطیف ئے شاعریا پدرا بنت ایں رچرڈ برٹنا صد و پنجاہ سال پیش سندھ ئے تر وتاب کرتگ ات وگوں وتی چماں دیستگ ات کہ سندھ ئے لس مہلوک گوں مست و ہنوشی شاہ لطیف ئے شعراں سازو آہنگا الہان کننت وشّی و غمی ئے ساہتاں بھٹائی ئے سوت، کافی و وائیاں الہان کن انت۔ آنہی شاعری ئے مزنیں بہرے وتی ڈیہہ ئے آسودگی و وشحالی ئے نیکیں واہگاں چکاراِنت ایشانی تہا آنہیا لس مردمانی ڈکھ و وشّی ئے عکس کشّی کرتگ۔ آنہی شاعریا زیملیت بازنت۔ پمیشکہ ہما مردم کہ آنہی شاعریا سرپد بنت۔ آہاں آسودگی و ایمنی رسیت بلے ہما مردم کہ بھٹائی ئے شعرانی نازرکی و معنا و بزانتا سرپد نہ بنت آہم آنہی شعرانی زیملیت و آہنگا چے وشنود و ہنوش گندگ کاینت نامی ایں اورینٹلسٹ ڈاکٹرپروفیسر این میری شملاشاہ لطیف ئے بابتا ہمنکس باز نبشتگ و آنہیا شاہئے شاعری ئے انچیں نوکیں پہنات دیما آؤرتگ انت کہ ایشانی گونڈیں چمشانکے ہم اے کتابا جاگہہ کت نکنت۔ شاہئے شاعری ئے زالیں کارستانی ذکرکناناں ڈاکٹرشمل نبشتہ کنت:’’شاہ لطیفا وتی شاعریا کہ ہما سادگیں سندھی زالیں کارست پیش کرتگ انت آدراہ انسانی ارواہئے جہگیر انت۔ سندھی صوفی شاعری چہ فارسی یا ترکی صوفیانہ شاعریا یکتاہ انت پرچیکہ اودا ارواہ و حدائے سیادی ئے بیان کنگ ئے وہدا شاعر گواچنی دوست ئے حاترا نریں(مذکر) صیغہ کارمرز کننت بلے سندھی شاعریا مدام ایشی ئے چپّگان بوہان پیداک انت ۔ایدا زالبول وتی مدامی دوستاوتی کنگا پہ ڈکھ ،درد سگّیت، عذاب کشّیت و جنجالاں گوں دیم پہ دیم بوّان اتکگ ۔شاہ لطیفا تصوف ئے اے بن گپّا را ہم لس زندئے تہا نمیرانیا پیش داشتگ۔ لطیف سکّی و گرانیں وہدا ہم وشّی و شادمانیا چکاریں سوت نبشتہ کنت۔
شاہ عبدالطیف بھٹائی کساس سے صدسال پیشا(1690) مٹیاری ئے نزیکا ماں ’’ہالا حویلی‘‘ آ علوی سَیدانی کہولا سَید حبیب شاہئے گسا پیدابوتگ ات۔ ہمے وڑا آنہی وفاتئے سال 1756 گشگ بیتگ۔ آں سندھئے نامی ایں صوفی شاہ عبدالکریم (بھلڑی والا)ئے کڑاسگ اَت۔ شاہئے کسانی کوٹریا گوستگ ات کہ اودا آنہی پت لڈوریچا پد جہہ منندبوتگ ات، شاہئے مئیل درکسانیا سَیلانی اَت۔ آمدام جنگل، کوہ و گیابانی نیمگا درآتکگ ات و داں دیراں ہموداایوک و تہنا نشتی بیتگ ات۔ آ نہیا اچ کماش و اُستاداں رواجیں علم بزاں قرآن، فقہ، حدیث، تفسیر، عربی ،فارسی او ایندگہ زانشت دربرتگ ات، بلے زانت و سما ئے ودّگئے ہمرائیا آنہی تہا علم دربرگا چے گیش صوفی، جوگی و درویشانی نیاما وہد گْوازینگ ئے ہُبّ گیش بوّان بوت وُُ ڈاکٹر این میری شمل ئے ردا ’’شاہا جوگی آنی یک ڈلّے ئے ہمرائیا توامیں سندھئے سیل کرتگ ات، بلکیں ماں بلوچستانا’’ ہنگلاج‘‘ئے اوں زیارت کرتگ ات کہ چریشی نہ تہنا شاہئے سیل ئے شوقئے درشان بیت بلکیں لس مردمانی مْیانا نندگ و زند ئے چست و ایراں سرپد بوہگ ئے سما اوں پدّربیت۔
آنہیا ہما چاگردا کہ چمّ پچ کرتگ اتنت، اودا صوفیانہ حیال، راگ رنگ و شعروشاعری ئے لس رواج ات و شاعری ئے میراث اچ شاہ کریم بلڑی والاا داں آنہیا سربوتگ ات، جوگی و صوفیاں گوں نند و نیاد آنہیا دوست بوتگ ،فارسی و عربی شاعری ئے حب اوں است ات و آئرا ربیتی بزانتا ’’عالم‘‘ گْوشت نہ بیت بلے آنہی سپاہ کتابی زانشتا چے زیات کازماس ئے شعور و ذاتئے پجّاروصفاتئے روشنائیادرپش اتگ ات۔ مقالات الشعرائے نویسکار میرعلی شیرقانع کہ تحفتہ الکرامئے اوں نویسکار انت و آئرا شاہئے امسوئی ئے اوں شرف حاصل انت، نویسیت کہ :
’’سیّد شاہ لطیف ئے گُڈّی وابجاہ اید ئے عجائیبات آں شمار بیت۔اے سیّد عبدالکریم ئے بچّ سیّد حبیب شاہئے (کہ تارکئے لقبا نامدار انت) پُسّگ انت۔ اے دورا ولایت ئے جہتا شاہ لطیف ئے ہمسرنیست۔ آنہی کرّامت و کتہ کار ی چوروچئے روشنائیا پدّرانت۔ اے گونڈیں بیانئے تہا آنہی ذکرسرجمیانہ بیت۔آروچی کہ آنہیا وفات کرت، آنہی غما بازیں مرید ہم بیران بوت۔ آنہی پاکیں ادیرہ ہمے بھٹاکراربخشیں ہندے آ انت۔ آنہی ادیرہ زیبائیں وڑے آ ٹہینگ بوتگ۔ جیسلمیر ئے راجاآ دمامہ پہ داد داتگ انت کہ سہب و بیگاہ وجّینگ بنت۔
مولانا روم ئے مثنوی، حافظ ئے شعر و رسالہ کریمیا گوںآئیا حاصیں دلبستگی یے است اَت۔ یک روایت یے ئے ردا اے کتاب مدام شاہئے گوئرا بوتگ انت۔ بلے آچیز کہ شاہ لطیف بھٹائیا را حاصیں وڑے آ بخشگ بوتگ ات آانسانی زندئے چہ نزیکاتپاس وکش و گوراں شنگیں کازماسئے ہُورتیا چمّ دیست(مشاہدہ) ات۔ کہ اچ ہمیشیا آنہی شعرانی تہا گْواچنی او دلکشی ئے اثر ودی کرت کہ نہ اچ آئی پیسر کسے آ نصیب بوتگ ات او نے اچ آنہیا رند داں انوگا کسّی بہرا اتکگ۔ آنہی شاعری لس مہلوکئے زند، مارشت،غم، ڈکھ، وشّی، ارمان، کینگ و کست و مئیل و چاڑانی آدینک انت کہ ایشی ئے اندرا آہانی زند ئے ساہگ و عکس سُرپُر وھرکت کنگا گندگ کاینت۔
شاہئے زمانگ اصلا چست وایرئے زمانگ ات۔ اے ہما زمانگ ات کہ مغلیہ سلطنت ئے بنجاہی سرکار پرشت وپروشا دُچار بوّان اَت۔ وہدے اورنگزیبا وفات کرت تہ شاہ صاحب ہژدہ سالئے سَندا ات بزاں نوک ورناہ ات۔ مغلانی سرکار چہ سندھا کساس ہلاس بوتگ اَت و کلہوڑہ کہولئے حاکمی بنا بوتگ ات و سندھئے مہلوک چہ مغلانی باجگزاریا آجو بوتگ اَتنت۔ مردماں اے ارمان دلا داشتگ ات کہ دری تاگتانی پنجگاں درآئیگا پد نوں امن و ایمنی نصیب بیت بلے چوش نہ بوت۔ دنیگتہ آترکانی و ارغونانی ظلما شمشتگ اتنت ونے مغلانی ہرروچیگیں ارشا پراموش اتنت۔ کلہوڑہانی آیگا چے حاکم و بدل بوتگ اتنت بلے حاکمی ئے رھبند ھما اتنت کہ مغلانی دورا رواج دئیگ بوتگ اتنت۔ چوشیں حاکمیا لس مہلوک ئے گہتری ئے راہ و دربند ات۔ سرا نادرشاہ ابدالی و پدا احمد شاہ ابدالی ئے لُٹّ و پُل ئے کسہ وتی جاہا موجود اتنت، ایچ ٹی سورے وتی نامی ایں کتابShah Abdul Latif of Bhit ئے پیشگالا ہمازمانگ ئے چاگردی وراجمانی جاور ئے سرجمیا تپاس کنان نویسیت کہ:
’’سندھ ئے سرڈگارا مغل و کلہوڑو دورئے حاکمی ئے بابتا ہچ یک بیانے شاہ عبدالطیف ئے ذکرا ابید سرجم کنگ نہ بیت۔ آنہی سیادی یک انچیں عہدے آ اَت کہ ایشی سیمسرا مغل حاکمی رخصت بوہگا اَت و کلہوڑہ حاکمی ئے روچ ٹک بوتگ ات۔ آنہیاوتی چمّاں گوں دہلی سلطنت ئے ساہگا را نزکرّان و آجوئی و وتواجہیا پہ جہد کنوکیں سندھ ئے ندارگ دیستگ ات۔ آنہی پیداک بوہگ و رفتن ئے پکّیں سال و روچ زانگ نہ بنت بلے1689 آبگرداں 1752 ئے میانی مدت آنہی زمانگ گوشت بیت۔آئی شمار انچیں شاعرانی تہا کنگ بیت کہ کُوچگی ہندانی تہا نندوکیں مہلوک ئے حاترا آنہیا شعر گوشتگ۔ شاہئے شاعری ئے راستیں پژدرہ ما تنا وہدی سرپد بوت نہ بیں داں کہ ہما لس مردانی زند ئے وڑ و ڈول، عقائد و توہماتاں سرپد مہ بئیں کہ ہمیشانی میانا نشتگ و آنہیاشاعری کرتگ ات۔ سندھا ہژدمی کرن ئے میانا ادارکی آجوئی و وتواجہی حاصل کرتگ ات۔ یک لس سندھی مردمے وتی تب و مئیل ئے ردا سہل پسند ومزن سگّ و اوپار داریت۔ پمیشکہ شیعہ و سنّی ئے میان باز کم تپاوت اَت۔گشنت وہدے اچ شاہ لطیفا جست کنگ بوت کہ تو شیعہ یے ئے یا سنی تہ آنہیا پسّو داتگ ات کہ من نہ شیعہ اوں و نے سنی بلکیں من دوئینانی میانئے پُہل یے اوں۔ آیک انچیں بے دروریں سپاہ یے ات کہ سندھا ودی کرت۔ ھیالی ازم و جبزگ سازیا آنہی درور نیست۔ آنہی زند،ہما دور ئے کہ آنہیا گوازینتگ ات ،ا وہما الس کہ کوچگی زندابندوک اتنت کہ ہماہانی میانا آنشت ات، آہانی چہرات۔ چہ اے راستیاکہ آنہی شاعری چہ بنداتالولاکی جہتے داشتگ ات، پدّربیت کہ آنہی کلوہئے جہلانکیاسندھی اُلس ئے توامیں ڈلّانی دلا آس جمبورکت، ایشانی تہا مسلمان ہم است ات و ہندوہم، وانندھیں مرد ہم است ات و بے وانندھیں ہم ، بزاں ہروڑیں مردم ہوارات۔
