زندگی ساھکندنئے ارجان پدا
وھدئے ہر گام ئے سفربیگا نگیں
روچ آتی کشک مٹ کتگ
ماہ ئے اوں بانزل پُرشتگ اَنت
کوہانی دروشم مٹ اِتگ
گوات ئے کوار اکُنٹگ اَنت
چو نیم جانیں بلی یے
پہ کجّوک و ناکامیں دلے
دیم پہ گلانی میتگا
ٹمبان و کتانیں رون
شال ئے ہمک دمک ودران
درچکانی تاکان سرچناں
چوبانا شکیں شکّ دیان
روچاتا شپ ، تا سہب و شام
جنزان پہ دینی آ روان
نیست ہچ کسے زرانکے بہ جنت
گوات ئے کوار ا دست بہ جنت
شال ئے دُنا نا پچ بہ گیپت
او کنٹگاں شنگ شنگ کنت
آزمان ئے ریکیں دامنا
تنّامیں برپیچکاں بہ شنت
کسّے نہ گواہیت گندگا
کسّے آ اوں توکل نہ بیت
شالا ہما شال اِنت گشئے
بلئے مہرانی آموسم کُج اِنت
ترک و توارے گواہ نہ کیت
ماڑی دروابا رگپتگ اَنت
یوسف کج اِنت عنقاکج انت
گل خان ، صمد ،کردیں عزیز ، ماما کبح اِنت
دروا بڈّ اِتنت
اھدانی قبرئے بے گومیں گو ن ئے لبا
کس سرنیتگ
باھند ئے ہار آ پہ سر ے راہی بکنت
بس دور ماں زرغون ئے مکیں ٹلے آ
شام آ برے استالکے سہرابیت
بلئے وھدئے آمجان زوت بارگیت
شال وَ ہما شال اِنت گشئے
مہرانی آموسم کج اِنت
کہ انگریں زردانا تا ہیر ے بہ دنت
پہ گنگدامیں سرزمین آ
گوانکے بہ جکسیت مہرواں
بیوانکی آ درائیں دمگ
سہت آ و پندول آ کتگ
ترک و توارے گواہ نہ کنت
شال وَ ہما شال اِنت گشئے
مہرانی آموسم کن اِنت
