امجد صاحودانی وتی روش ئے دفتری کارانی لسٹا چارغا اث کہ چیڑاسی آ آف ئے گلاس میز سرا ایر کثو، امجد پلواچوں سوالیغا ڈولا چھارثہ۔ امجد دہ سرپث بیثہ کہ اے مڑا کارے است۔ ۔۔پھول کثئی، ’’چے مسلہ ایں‘تھو چے آ پریشان ئے ؟‘‘ چیڑاسی آ گوں باز ادب ولحاظا گوئشتہ واجہ تئی آئیغا شے پھیشا ، پیریں زالے گوں ورنائیں جنکھا تئی وداریغانت ، بل تئی حکم ئیں کہ تھو داں دو ساعتاں ملاقاتیاں ٹائم نہ دیئے۔ گُشنت کہ واجہ ئے دوست مہراللہ ماردیم داثہ ’’مہراللہ ! امجد صاحویہ لحظہ ئے آ متھاول داثووثی ہمے دوست وبرادر گیرارتہ و برشکند غ کُشو گوئشتہ ’’ہو مہرا للہ مناں فون دہ کُثہ ، بُرو مہماناں ایذابیار ا وچائے ، آفے ئے دہ بندوبستا کن‘‘ہے نہ ویثہ کہ ماث جنک امجد صاحو ئے دفتر انشتی آثنت، چیڑاسی آ آ ف چاہ و جوس آڑتھو دیما ایر کثغنتئے اے نیاما امجد صاحو آ چو دُزکائی ہمے درنائیں جنک نیاما چھارثہ و پدا کمپیوٹر سکرین سراچم سک کثو خیالانی آواربیثہ۔ لحظے آ پذا امجد صاحو آ پھیریں زالا شے پُھول کُثہ ’’ہاں اماں گُوش شئے چھے کاریں؟‘‘
پیریں زالا وثی ساہئے ویلانی سراقابو کناناں گوشتہ ’’ابا، اے مئیں جنکھیں ، ایشی ملازمت ایں سکول لافا۔بل نی ایشانی افسرا ایشی تبادلہ کثہ، شہرا درا آں دیرین اوغانانی ڈیھا۔ مئیں بچ پولیسا ملازمیں او علینہ ئے سکولابرغ آرغ مئی وسی کارے نئیں۔ او نئے اے سیاہ سریں ورنائیں جنکاایکھوا دیم داث کھناں ۔۔کسے آ گوشتہ کہ ایشانی افسرتئی دوست ایں۔مہروانیاکن ایشی ئے تبادلہ آ روکائیں و پھذاوثی کلی ئے سکولا بیاری ‘‘۔پیریں زال کہ اے قصواں کھنغ اث، امجد صاحب تہ علینہ ئے سیاہ مار ڈولیں ، دلاں ڈنگو خیں گڑدیں چماں دیہان اث ۔۔ علینہ پھاذ پھاذ چھکھا ایر کثی آ چوباز گوں دلجمئی نشتو، وثی ماثئے ٹوکاں اور امجد ئے چمانی پیغام اش کنغ اث گشئیکہ اے زیبائیں جنکااے باوراث کہ امجد صاحو ’’ناہ‘‘ کُث نخنت۔۔علینہ ئے ریشمیں دست وثی زانسرا ایرثنت او دراژیں راما ئے پھلی ڈولیں موڑ دانغ چھوں کرغ بن بیغ ثنت گُشے پیانو سرا مہرئے زیمرے رواں دیغ اث ۔امجد ئے چم شے ماہیں دیما زنریریں زلفانی پلوا شتغانت تہ اے سیائیں ماہ پر سیاہ مار ئے ڈولا ، زیبائیں دیمہ سرا ہمے ڈولا پہر ودیغ ثنت ،۔کہ زمانغانی پورثغیں خزانہانی سرا مارپہرہ دیئنت۔۔۔ امجد صاحو ا وثی پی اے آ گھنٹی داثہ او گُوئشتہ ۔۔ڈائریکٹر سکولا گوں مئیں ٹونکا کنائیں ۔۔ ٹیلفون کنغا رند امجد صاحو آ چو فاتح ئے ڈولا ، علینہ پلوا دیم کُثہ و گوئشتہ ’’میڈم تئی تبادلہ ئے آرڈر منسوخ بیث غنت۔۔۔ فکرا مخن ۔۔‘‘ علینہ ئے ماثا بازیں منت واریا پھذا موکل گفتہ تہ امجد ئے دلا لوٹثہ کہ اے جنکا یا تومئیں فون نمبر لوٹثیںیامناں وثی نمبر داثینی ۔۔آخری وختاآکہ اے دوئیں کار نویثغاں تہ امجد صاحو وثی ورٹنگ کارڈ علینہ ئے ماثاداثو گوئشتہ’’اے کارڈ ایر کنئے ایشی سرامنی دفتراوموبائل ئے دوئیں نمبر است انت ، کارے بیثوتہ مناں فوناکنیں‘‘۔ علینہ آ دفتر ئے دروازہ سرا جکھثو ،پذادیاں کثو، برشکندغ کثو گوں خاصیں ادائے آ شکریہ ادا کثہ و سلام کثوشتہ۔۔۔امجد صاحوئے آں روش گوں خیالاں، لیکھواں گوئستہ ۔۔باریں علینہ فون کھت یا ناں۔ شفا دہ آزمان ئے استاراں لیکھانا آنہیا حیال کُثہ کہ دنیائے چھیں خوش نصیوے بیث کہ آنہی ئے بہرا اے منڈکیث ؟
امجد ا ڈاٹسن ئے ڈش بورڈ چکا لکھثی آ دیثہ نی گیرآتکی ’’سندرہا تھ سنہری زلفیں کوئی تو ان کو چھوتا ہوگا‘‘۔مناں تو امیت نیست ایں کہ من تو زیندے پنجاہ چیتر گوازینتو نشتغاں۔۔۔افسری وثی ہندا ، آں جوانڑی ئے جادوئی کشش نی تھا میں ۔۔۔بل پھذادِہ آں ناامیت نہ اث۔ آنہی آ باوراث کہ اے جنک ضرور رابط کنت۔۔۔ہمے حیالاں دلا وش کھناناں امجد وثی دفتر آ روغ اث کہ موبائل ئے گھنٹی واہی آن دارغاث ۔۔۔امجد آ کہ داں دام روشءَ آں رنگیں فون نہ زُرتہ انت کہ نام معلوم نیث۔بل زی آ شے امجدہر کالا اشکھنغ اث کہ شاید علینہ ئے فو ن مویث ۔۔
گاڈی ئے رفتارر کمیں نرم کثو ، فون سرا ہیلو کثئی تہ گُشے قارون ئے کلیں خزانہ آ مڑدئے دستا کفتغنت ۔۔دومی پلوا علینہ آہیلو کثو ، سلام کُثہ کاربیغے پھذاوتی سکول آ آئغئے شکریہ اداکثئیا ورابط دار غ ئے عہد کثوفون بندکثئی امجد گُشے وشی آ شے بال گر غ اث ۔۔دو سے دَھکا گاڑی ئے آ ہری نیاما وثی بالاذ دیہاں کثو پھذا ورنا بیثو دفتر اسربیثہ ۔مرشی دفترے فائل چوں چوری ایں چکانی ڈولا روش سراوہاوثنت ۔۔صاحوئے دنیا نی اے نہ یث۔ لحظے نہ گوستہ کہ علینہ ئےSms آتکہ call me if free کھورچھے لوٹھی دوچم ، امجدا دستاں لڑزینانافون کثہ، علینہ ئے ٹونک چھوں زیمرے ڈولا دلا ایر کفغاث ۔’’امجد صاحو آغا تئی اجازت بیث من تھرا Smsآں کھناناں سرکھاں فون نخناں کہ تھو وتی دفتر اباز دست گٹیں افسرے ئے‘‘۔ امجد ئے اجازت تہ رکانی سرا ایرث ۔۔ دل ئے حباگوں yesکثؤ اجازت داثی۔ نی روش ، شف ئے فرق نیست اث کہ Smsسرا درُائیں حال احوال دل ئے خواہش ، حسن وزبیائی ئے صفت وستا ، شاعری و موسیقی شروع بیثہ۔ امجد صاحوئے خوشبو او کریم بدل بیثغاں ۔۔باز قیمتی ایں سوٹ تیاربیثغاں سہُررنگیں ٹائی دہ امجدئے نوخیں دورئے حالاں دیغ اث ۔پیشا دوہفتگا پھذا مودانی سیاہ کھنغ ئے عادت نی بدل بیثغہ ، ہرروشا دفتر روغا پیشا امجد صاحو، سالونک ئے ڈولا تیار بث ۔ لوغے درائیں مرد حیران ثاں کہ اے امجد ا نوخیں دور وجوانڑیں شے اَش کو آتکہ۔ علینہ دہ ہفتہ آ دوروشا دفتر کھاتک و نازو ادآں گوں واجہ ئے کیسغہ ژہ وثی خریداری ئے خرچی ءِ زرزُڑتھ و پھذا شت۔ وخت ئے رفتار گُشے اوشت ئے ماچ اث۔۔ ہر شئے رنگ ونور نیاما گاراث ۔ ۔ امجد صاحو ئے دفتر پھلوا ہر کسے، کاروالائے یا چیڑاسی دہ بیاتکیں دہ صاحو ا آنہی ئے قذمانی توار ا لگسث کہ علینہ پیذاخیں ۔ ۔۔ امجد صاجو گُشے تی دنیا ئے تہازیند آ گواز ینغاث۔۔آں مڑد کہ وثی پروموشن بارواہر وھدے جُہدا اث نی امجد ا شمشہ ، دفتر اچھے بیغاث شہرے حال چھے اث؟ کھئے کھیا دیندار وبے دین گُشغ اث ؟۔ سیاست تہا چھے بیغ اث، وزارت کجام پارٹی آ ملغ اَث ، عزیز رشتہ دار ، چھک چھے کنغ ات؟ بچے سکول تہا پوزیشن چھے ایں؟۔ امجد صاحوا گوں اے دنیا ئے ہچ مسلہ آکارنیست اث۔ ۔ آنہی دنیا شے علینہ آشروع بِث اور علینہ بالاذا گوں ختم بِث ۔۔ہمے نیاما روشفانی ماہ گوئستہ ،عیدے روشاامجد ئے خوشی ہئے کہ کسےءَ دیثیں۔آں وختا امجد ا smsآتکہ’’ اب یہ دل صرف میرے لیے دھڑکے گا‘‘۔واقعی ہمے رنگا اث، امجد ئے دل نی صرف علینہ واسطہ دھک ھک کھنغ اث۔۔۔عید چھٹی ہلاس بیثغ انت ا و دفتراولی روش اث۔ سرکاری دفتر انی حاضری عید چھٹی آں پھذ نہ ویغ ئے براوراث۔علینہ کہ عیدی گرغ و عید مبارک دیغا دفتر اآتکہ تہ ہر پلولے ویرانی اث ۔امجد آدست دراژکثہ کہ عبد مبارک باشے ، بل علینہ آ دیما بیثو امجد صاحوبھانکراں گفتواو دراژیں امباز غے پھذاگُوشتی، عیدآنی چھکا مبارکی دیغ ئے طریقہ اِش انت۔۔امجد ئے ساہا وثی رفتار شمشتہ ۔۔۔کرسی چھکا کہ نشتہ تہ علینہ آہمکر گوشتئی ’’مناں ہوش آ غا بل‘تھومناں ہمکر مہروخوشی دیئغ اے ، تڑسغاں کہ ساہ درمخفی ۔دروکھے پذا چیڑاسی آتکہ ، چاہ و بسکٹ آرغ بث غاں، چاہ ئے پیالی زیرغ وھداں امجد ئے دستانی لڑزغ ، ارمان کہ کسئے آ دیثیں۔
نی ایکھویں ملاقاتانی سلسلہ دہ شروع بیثہ۔ امجد صاحوئے لوغی حیران اث کہ دوسے ماہ بیثغاں امجد الوغ ئے ضروزتانی بیچ ھیال دہ نیست ایں۔ تنخواہ دہ نی لوغا نیاغ اَث ۔امجد دہ بازیں شفاں گوں افسرانی میٹنگ یا،پارٹی تہا دست گھٹ بیغے بہانہ کث لوغا نیاتک، تنخواہ ہاں تنخواہ ئے زر آں سنگت ئے ماث نادراہیں ہماں مڑدا پور زڑتہ۔
چھپار، پنچ ملاقاتاں پھذا، روشے آ علینہ آگوئشتہ ’’۔امجد من وثی ماثا ڈسثہ کہ مئیں دست گہارے ئے سیریں۔من شے سکولا ہموذا رواں و شفا نُہ وجہ آ داں گڑاں کھایاں فکر مند موی۔ اے موسماچار ہر پلوے ساڑیتیں گواثانی سڑداری ایں کوہانی سرابوریں ۔تھو دہ بانگھا شے دفتر ا چھٹی ئے گر او دہ وجہ زیارتا روں۔ مناں زیارت ئے بور گندغ ئے سخت حُب اٰیں۔ روشا ہموذابوں، نواشامی گڑدوں کھاؤں ۔ ہمے ماہا چھیار شش ملاقات اولادہ بیثغا ثانت ۔نی علینہ ئے اے ڈیمانڈ دہ پھیلو کھنغ ضروری اث۔ بل نی امجد ا باور کثہ ا و پوہ بیثہ کہ کشک کہ ہڈا دفا کثی ءَ ایں آں وثی وفے ہوناں شے مزہ گرغ ایں۔ نی علینہئے ہماں ماورائی ا ودیومالائی حیثیت دہ ختم بیثغاث چھو عامیں جنکے اث، سکول ٹیچرے ، غریب ئے زر دوستیں و لالچی وغیرہ وغیرہ۔ بلے لوغ بر باں مڑدانی ہوس ئے کہ پھذا دِہ امجدا علینہ زڑ تؤ زیارت ءَرائی بیثہ۔ وثی محکمہ ئے ریسٹ ہاؤسا سربیثہ تہ چوکیدار ا کمرہ کھول ثو، صاحو ا شے پول کثہ،، کھانے میں کیا کھائیں گے سرجی ۔ چوکیدار ا شر زانت کہ علینہ، صاجوئے وثی لوغ ئے مڑدمے نہ ایں ۔۔بل آنہی آگوں اشی چھے کاراث؟ اے شہرئے شہ کلیں زیادہیں تعریف ہمیش اث کہ آں ہندئے ہوٹل والا ، رسٹیورنٹانی چوکیدار، باورچی وغیرہ اے ماحول ئے شری آ عادت بیثغانت کہ ہر کسے کہ ایذ ا کھیت آں وثی لوغی آپجی آ کھاریث ۔امجد آ گیر آتکہ کہ آں کہ اولی برا اسلام آباد آشے جھیل سیف الملو کا َ شتہ تہ آں ہندے گائیڈ ا شے پھول کثئی ، ’’ہم نے سُنا تھا خان صاحب کہ یہاں چودویں کی چاند کی روشنی میں پریاں اس جھیل پر آتی ہیں میں چاند کا حساب رکھ کر یہاں آیا ہوں ، یہ پر یاں کس وقت آتی ہیں؟‘‘ گائیڈا حیران بیثؤ مختصر جواب داثغہ۔
’’ بھولے بادشاہ ۔لوگ پریاں اسلام آباد سے ساتھ لے کر آتے ہیں‘‘
تم یہاں ڈھونڈ رہے ہو؟۔ ہاہاہا
امجد امرشی تہ پری ئے گون اث بل امجد صاحو نی شہزادہ سیف الملوک نہ یث ۔ دو سے ساعت ئے ڈرائیو کھناغا پھذا آنہی ئے ہر ہندا گوشے مانشفوخیں دڑدے اث۔ چوکہ روشغ دراغ وختہ تھن نیست ایں زورکائی آف ورغی بیث، ہمے ڈولا امجد ا دہ روش زیارتا گزار توبیگھا کہ گڑدغاث تہ علینہ آنہیا چھوں سہ گیست سالیں پھیریں زالے ڈولا نغاہا آتکہ ۔نی آں علینہ ئے پلوا چھارغ دہ نہ یث، دلاگوشتی کہ اے دوسے ساعت ئے مزل چھوں گزی گوں اے ڈئینٹرا اوارغی آ؟ اے خیالا نی آواراث کہ آں شہر ا سربیثہ، رکشہ ئے داشتو علینہ آنہی حوالہ کثئی ۔لوغ ئے پتہ رکشہ ڈرائیورا پوہ کثئی ۔ کرایہ داثی۔ علینہ کہ جست کُثہ واجہ تھو مناں اے رکشہ آ تہا چھے پہ دیم دیئغ ئے ۔ امجد آچھوبازیں سردمہری و بے مہری ئے اندازے آگوشتہ ۔گاڑی گرم بیغ ایں من ایشی مستری ئے آشون دیاں ۔ہاں من ماہے روش واسطہ ٹریننگاروغاں گڑداں کھاں تہ تھراوث فون کنان۔ علینہ وثی دستی بیگ زڑتھو رکشہ نشتہ و گوں خاصیں برشکندغے آ امجد صاحو ئے پلوا دیثو گوشتی ’’واژہ ! ہشت دہ ملاقاتاں پھذا رکشہ سرالوغ روغ پرما نوخیں کارے نیئیں ۔وتی حیالا دار وش باثے۔
امجد امحسوس کُثہ کہ ظالمیں وختا وثی دوئیں دستانی بُجہ گوں تھافغ ئے شیری دیما مَلثو آنہی ئے دیما جثغاں۔ اے وہدا امجد ئے انیشغ سرا زمستانہ باوجود ہیذ ہے کہ کسے آ دیثیناں۔۔۔
