(شاہ حسین دے ناں۔ جنہاں نے ماں دے ناں کافی لکھ کے اپنی امڑی نوں امر کردتا)
غماں دے نے حال مائے
لنگھے کنے سال مائے
اکھیاں توں دور ہوئے
ہجراں دے نال مائے
اپنے شریک ہوئے
ویکھے نی کمال مائے
وصلاں نے بال دِتے
آپ ہن پال مائے
متاں میرا خان ہووے
پاکوئی فال مائے
عمراں تے کجھ نئیں سی
چٹے ہوگئے وال مائے
لوکاں کیتے ہاسا ہویا
میرے لئی تے کال مائے
اجے تے میں بالڑی آں
پیار پایا جال مائے
اپنے تے غیر سارے
پچھدے سوال مائے
جگ نے ایہ حال کیتا
بھل گئی اے چال مائے
موت میرے بوہے آئی
جاکے آپ ٹال مائے