انسانی تاریخ روچے یک دیمے تاب کنت ، برے ماں کور کشکاں جہلگ و برزگاں جہل و برز بوہانا برے ماں مادنیں راہے سرکشّیت ۔ گیشتریں سوشل سائنسدانانی منّگ ہمیش انت کہ تاریخ چو گردانکے ئے پیما یک جاہے آ بندات بیت و یک وہدے وتی عروجا سربیت و پدا دیم پہ زوال ئے نیمگا روان کنت ،ہما جا ہا کہ بندات بوتگ ۔ بلئے سوشل سائنسدانانی دگہ یک ٹولی یے ئے منّگ ہمیش انت کہ انسانی تاریخ مدام تچکی آ دیما ر وان انت و ہمک آؤکیں روچے یک نوکیں رنگے دیما کاریت ۔ بازیں وہداں لس مردم یک کہولے ئے عروج و زوالا سرجمیں راجے ئے تاریخا گوں بندوک کن انت بلئے اے حبر رد اِنت ۔ راجانی تاریخ سرجمیں طبقاتانی تاریخ انت ۔ شاہ و بادشاہ وتی زور ئے کمکّا زندگ مان انت بلئے لس مردم ئے لیکہ و جنجال تاریخ ئے روح انت ۔
پشتون راج دنیا ئے تہا یک مزنیں و کوہنیں راجے لیکگ بیت ۔ اے راج ہم چہ تاریخ ئے بازیں پیچ و تابے آ گوزانا تا مروچیگیں اہدا رستگ و وتی جتائیں پجّارے برجا ہ داشتگ ۔ بلئے اے راج دنیا ئے ہما حسّاسیں سرڈگارا نندوک انت کہ اے ہندو جاگہ ہروہدو زمانگا مزن مرّیں میان استمانی طاقتانی چمّانی چیرابوتگ انت و داں روزگارئے مروچی ہم است انت ۔ اے راج ئے مستریں بہرے ماں افغانستان ، خیرپختونخواہ و بلوچستانا جہہ منند انت ، اے ہما ہندو دمگ انت کہ مدام میان استمانی طاقتانی گوک مڑی ئے میدان بوتگ انت ۔ ہمے سبب انت کہ پشتون راجا ہجبر آرام ودلیں زند نہ دیستگ ۔ چوکہ کمال خان شیرانی وتی نبشتانکے ئے تہا نبشتہ کنت و وت ہمے حبرا منّیت :
’’ما وتی ہما دژمنانی دستا باز پروش وارتگ،ہما کہ مئے جندئے اندرا است انت و ہمیشانی سببا ما وتی براتانی حون تنگ اتگ انت ۔ دژمن ئے چانوگر ہروہدا مئے سرڈگارئے ویرندانی ئے رندا انت و دژمنا مارا انچو یکے دومیگا چہ سستگ کہ ماسدا ں چنڈانی تہا بہر بہریں ۔ لہتیں قبیلہانی ناما ، لہتیں ایجنسیانی ناما ونڈ ونڈ کتگ انت ۔ ہما غدار کہ وتی سرڈگار ئے گاری ئیرندا ا نت چہ ہماہانی سببا ما وت واہندی ئے جاگہا روچ پہ روچ غلامی ئے نیمگا روانیں و ہرچی کہ مارا مئے واجہ گشیت ماہما پیم کنیں ‘‘۔
چرے حبراں پدّر بیت کہ پشتون یک مزن مرّیں و نہ ترسیں راجے آ ابید ہم وہدئے تاڑ و تیلانکانی آماچ انت ۔ چہ زمانگاں اے راج ہرروچ گوں نوکیں دژمنے و نوکیں جنگے آ دیم پہ دیم انت ۔ ہمے جنگانی سببا باز تمردو نہ ترس جوڑ بوتگ بلئے دومی دیما اے تاوان رستگ کہ سرجمیں راج انفرادیت ئے ہرجان انت و یک جاہی آ ہچ وڑا جاڑی نہ انت ۔ ہمے راج ئے یک مزن مرّیں بامردے سائیں کمال خان شیرانی انت کہ آنہیا وتی سرجمیں زند پہ پشتون ، بلوچ راج و پہ انسانیت ئے باندات ئے سمبہینگا ندر کت ۔ آنہی ئے درگتا خیر بخش مری ئے اے حبر راست انت ، وہدے کہ آنہی ئے نادراہی ئے حال رست تہ آنہیا یک چٹّے ئے سرا نبشتہ کت و پہ کمال خان شیرانی آ دیم دات ۔ چو نبشتگ ’’مہ مر ڈ دانڑتی مہ مر ، مارا گزرئے۔ تہ چھڑو پٹھانڑے نہ ئیے ، انسانے ئیے۔ اسلام آبادہ نہ روئے ، تقریر واگھی سیٹہ نندوخے نہ ئیے۔۔۔‘‘
سائیں کمال خان شیرانی ئے سرا نبشتگیں شاہ محمد مری ئے کتاب کہ ونت تہ اوّلی رندا سما بوت کہ بلوچستان ئے ہاکا ہم چشیں بچّ ودی کتگ کہ آ انسانیت و عالمگیریت ئے بیرکا دستا کت بہ کن انت ۔ سائیں کما ل خان شیرانی چہ ہما سراں یکے ۔ آنہی ئے فکری بالادئے برزی چہ ہمے حبراں کیاس کنگ بیت کہ وہدے امریکی سامراج 19جون 1953ء آ بزّگیں جن و مردے آرا بجلی ئے کرسی ئے سرا کرنٹ جنگ و کُشگ بیت ، ہمے حبرا سائیں کمال خان دنیا ئے یک پد منتگیں ہندے، (بلوچستان )آ وتی ماہتاک ،، پشتو،، ئے اوّلی پیشگال ئے تہا چو نبشتہ کنت :
’’ظالمیں امریکہ ئے سرکارا 19 جون 1953ء آ دو بزّگیں مردم بجلی ئے کرسی ئے سرا کرنٹ جت و کُشت انت ۔ اے دوئیں مرد و جن ات انت ، ایتھل و روز نبرگ، اے سئے سال ساری ہمے واستا دزگیر کنگ بوتگ ات انت کہ اشاں ایٹمی راز دگہ ملکے ئے گورا پاشک کتگ ۔ بلئے ہچ چشیں نشانی یے نیست ات کہ زانگ بہ بیت اشاں پہ دل انچوش کتگ ۔ لہتیں روچ ساری جولیس ئے ماتا ہم گشتگ ات کہ من زانا ں کہ منی چکّ بے گناہے ۔ منی چکّاوت منا گشتگ کہ من ہچ چشیں کارے نہ کتگ ۔ بلئے پدا ہم کسّا ہچ کت نہ کت دانکہ امریکی سرکارا دوئینانا کُشت‘‘۔
دیمترا ہمے کمال خان امریکی استعماریتا پاد تراپ دنت و گشیت کہ ترا مزنیں نادراہی یے گون کپتگ کہ تونوں وتی جندئے پاداں تپر جنگا ئے ۔ دانکہ جہان است ا نت ایتھل و جولیس روز نبرگ ابدمان انت ۔ سائیں کمال خان شیرانی تہنا بلوچستان و پشتون راج ئے رہشون نہ انت بلکیں اے پیمیں مردم سرجمیں انسانیت ئے درد وار و رہشون انت ۔ وہدے آنہیا وتی وانگ و زانگ سرجم کت و چہ اسلامیہ کالجا بی۔ایس آنرز ئے ڈگری یے گولڈ مڈلسٹے ئے جہتا دست گپت تہ آنہیا تحصیلداری ئے نوکری رست۔ بلئے آ چشیں انسانے نہ ات کہ وتی زندئے آسودگی ئے حاترا مہلونک ئے سرا ہرچی بیت بہ بیت آنہیا سگّ ات بہ کنت ۔ آیک انچیں واکے ئے سرا ات کہ آنہیا را وتی افسرِ اعلیٰ ئے درائیں حبرانی رندگیری کنگی ات ۔ اگاں دلا بہ لوٹتیں ہم آنہیا پہ وتی مہلونکا ہچ کت نہ کت ۔ آیک عملی سوشلسٹے ات ۔ آنہیا تہنا کتابی حبر و لیکہ یات نہ کتگ و دیواناں نہ گشتگ ات انت آنہی ئے واہگ ہمیش ات کہ آنہی ئے کردا چہ ہمے حبر درا بہ بیت ۔ آ برابری ئے منّوگر ات ، ظلم و زوراکی ئے مستریں دژمن ۔
کمال خان شیرانی اے ہندا علم و زانت ئے سر چمّگ ات ۔ آنہی ئے واہگ بس ہمیش ات کہ وتی مہلونکا ، بلکیں سرجمیں انسانیتا چہ ظلم و زوراکی ئے قید و بنداں بہ کشّیت و درائیں انساناں یک انچیں جاہے سر بہ کنت کہ ہودا آ برابر منّگ بہ بنت ۔ ہمے حاترا آنہیا نندگ و کتاب نبشتہ کنگ و چہرو شبینی تقریر و کوکّارئے بدلا وتی مہلونک ئے نیاما نشت و ہماہانی تربیت ئے بارے وتی کوپگاں زرت ۔ چوناہا بلوچستان یک انچیں ہندے کہ ادا گیشتریں مہلونک شوانگ و بزگر نت ، ہمے حاترا ادا کسّا چو گشگ نہ بیت کہ برو مارکسی فلسفہ آ وان و سرپد بو ۔ اے ہنداں کمال خان شیرانی ئے پیمیں رہشونے چوشیں مشکلیں کارے سرجم کت کنت ۔
چوناہا بلوچستان ئے ہاکیں انچیں کہ ادا گیشتریں مردم راستی ئے سرپد بوہگا پد جذباتی بنت و وتی زمینی حقائقا ں ڈالچار کن انت ۔ ہرنوکیں فکر و لیکہ آ ہمائی ئے اندری ارواہ ئے ہوری آ ایر برگ لوٹ انت ۔ بلئے کمال خان اے درگتا یک جتائیں لیکہ یے ئے واہند اَت ۔ آنہیا وت سرکاری واک ویل کت و شپ روچے گوں مہلونک ئے ھذمتا گوازینت انت بلئے پہ دومیگاں آ اے حبر ئے پلّہ مرزے نہ ات ۔ چیاکہ آ اے حبرا سرپد ا ت کہ یک سیاسی گلّے یا رہشونے ہما وہدا گوں وتی مہلونکا ہمگرنچ بوت کنت کہ آنہیا پہ دیوانے آ بہر زورگ ئے حاترا پہ کرایہ آ دگرے ئے گورا دست ٹال کنگ مہ کپیت ۔ شاہ محمد مری نبشتہ کنت کہ لاہورا درانڈیھی آ پد وہدے من ہچ رنگا جاڑی نہ اتاں و وار وار ہمے یکیں حبر ئے سر داشتگ ات کہ من نوکری نہ کناں ۔ من شپ رو چ گردوکیں انقلابی یے آں ، بلئے کمال خان شیرانی ئے ہمے حبر کہ تو ڈاکٹرے بئے تئی گورا زرّ بیت ، ایمبولینس بیت و دوا و درمان ہم تئی دستا بنت تو گوں ہمیشاں مہلونک ئے ھذمتا کت کن ئے ۔ گوں ہمے حبراں من پہ نوکری آ جاڑی بوتاں ۔ چرے حبراں پدّر بیت کہ آنہیا ہر چیزا را ہمائی ئے تب ئے ردا چار اِتگ و جہہ آؤرتگ ۔
کمال خان وت سریں مزن مرّی و شخصیت پسندی ئے ہجبر منّوگر نہ ات ۔ نہ آنہیا کدی وتی جند مزن لیک اتگ ات و نہ کہ وتی کاروان ئے دگہ باسکے آ اے حبر ئے اجازت دےئگا جاڑی ات ۔ آنہیا ’’ استاد ‘‘ئے لبز ئے جندئے سرا بد اَتک ۔ چیا کہ وت پسندی یک انچیں نادراہی یے کہ مردم ئے اندرئے سنچا ہلاس کنت و انسان ئے تہا ہمے مارشتا ودی کنت کہ آ چہ ایندگہ مردماں جوان تر اِنت ۔ گڑا چشیں مردمے ہجبر دومیگانی رہشونی آ کت نہ کنت کہ آ وتارا جوان تر سرپد بہ بیت و وتارا باز اہم سرپد بہ بیت ۔
شاہ محمد مری نبشتہ کنت کہ،، ڈاکٹری ئے نوکری آ پد وہدے منا پہ کار ئے حاترا ژوبا دیم دےئگ بوت تہ منی استاد (کمال خان شیرانی )پیسرا ہمودا ات ۔ ہمے حاترا منا ہودا رؤگ چہ ہرجاگہا دوست تر ات ۔ بلئے ژوباکہ من شتاں ہوداں آئی ۔ ایس ۔ آئی ئے کیپٹنے آ منی رندگیری بندات کت ۔ ہرروچ منی گوار اتک و منی کوٹی آ ہم پترت ، گوں من ہرروچ نزّیکی کنگ ئے جہدا ات ۔ ہروہدا گپّ و تران، برے جست تو کجائے ، تئی چے حال انت ؟ برے گشتے نندیں ورگ وریں ، برے گشتے فلاں جاگہا ہور رویں ۔ من چریشی ئے ہرروچیں حبراں بیزار اِتاں ۔ گڈّی آ کہ من ہچ راہ نہ برّ اِت گڑا پیر مردیں پولیٹیکل ایجنٹ ئے گوار منی شکایتے کت ۔ پولیٹیکل ایجنٹ آ منا فون کت و گشتے کہ تو و فہیم (آئی۔ ایس ۔ آئی ئے کیپٹن) وش و ش نئے ، شپی نانا شما دوئیں منی کرّا اِت ۔ نوں من حیران بوتاں کہ من وَ دگہ وڑ مانگیش اِتاں ۔
من ہما دمانا ایمبولینس آ سوار بوتاں و شتاں سائیں کمال حان شیرانی ئے گورا ۔ آنہیا را درائیں حبر یکّ یکّا حال دات انت ۔ من سکّ پریشان اِتاں کہ من چون بہ کناں کہ چہ سرکارئے چیر گیتکگیں داما بہ رکّاں ۔ سائیں آ بادام آؤرت و وت کپّ کنگ و ورگا لگّ اِت و منا ہم سنگے و لہتیں بادامے دات کہ کپّ کن و بور بلئے من کجا ورگی اتاں ، چشیں بلائیں جنجالے آ مانگیشّ اِتگ اتاں نہ ۔ یک زنڈیں دمانے ئے حاموشی آ پد سائیں آ دیم ترّینت و چو ہور و گوات ئیگا ایر داتے ،، تو یکبرے منا بہ گش کہ تئی کرّا چونیں رازے است کے سرکار تئی دمبا کپتگ ، ؟۔ تو کجام انقلابی گلّ ئے سرکماش ئے کہ تو مبئے آ درائیں گلّ تش تش بیت ؟۔ تو زانا کجا بمب و ٹوپانی کارجاہے مکّ کتگ ، حدا آ بچار وتارا چشیں مزنیں مردمے سرپد مہ بو ، تو منی پیمیں یک لس مردمے ئے ۔ وتی کدّا بو ۔ پادا نوں سیدھا بو ، مردمے بو ، ہچ نہ بیت ترا ۔ برو فہیم ئے گوما گرد ترّ ، ہرجا ہ رؤئے برو ۔۔۔،،
ہر جنزے کہ بندات بیت آنہی ئے تہا بازیں چپّ و چوٹ و جہل و برز کا انت ۔ برے برے جنز انچیں جاہے سربیت کہ لس مردم ہمے سرپد بنت کہ بس نوں منزل رستگ بلئے چو نہ انت ، جہل و برز ی جنز ئے بہر انت و راجی حقیقی رہشون اے چیزاں سرپد بنت ۔ انچو یک رندے یک سکالرے آ پٹّ وپول ئے درگتا سائیں کمال خان شیرانی آ چہ بلوچ راجی جنز ئے ٹرننگ پوائنٹ ئے بابتا کہ جست کت تہ آنہیا وتی فلسفیانہ پسّو اے رنگا دات :
’’ ہر جنزے ئے تہا جہل و برز کا انت ، جنزانی تہا ہجبر ٹرننگ پوائنٹ نئیت ۔ جنز ئے درور چو یک ساہدارے ئیگا انت ۔ اے بنداتا کسان بیت ، پدا رُدان کنت ۔ وہدئے ہمراہی آ اشی ئے کدّ و بالاد و رنگ و درشم ہم مٹّ بوہان بنت ۔ چو ساہدارے ئے پیما اے گوں چاگردا وتارا ہمگرنچ کنت ۔ اے نادرا ہ بیت پدا جان سلامت بیت ۔ برے نز ور ترّیت و پدا تمرد بیت ۔۔۔بلئیابدمانیت ۔
مروچیگیں ہم بلوچستان آ کہ ترقی پسند جنز کہ است انت ہزاراں چپّ وچوٹاں پد ہم جنزان انت و کمال خان شیرانی ئے فکر ئے رندگیری آ ابدمان انت ۔ چیاکہ حقیقت پسندیں رہشونانی کاروان مدامی ابدمانیت و آہانی کاروان ئے باسک داں ہما وہدا مان انت دانکہ سرجمیں انسانیت چہ زواکی ئے چنگلاں آجو نہ بیت ۔ اے پیمیں رہشون وتی فکری و راجی کدّ و بالاد ہم جوان سرپد انت ، ہمے حاترا بال کنگ ئے جہد ہجبر نہ کن انت و گوں وتی وتگڑیں و مانگیشّ اتگیں فلسفیانہ حبراں لس مردماں مان نہ گیشّ انت بلکیں مدام پہ رہشونی آ لس مردم ئے زبانا تران کنانا ہماہانی جنجالاں سرپد کن انت ، ہما کچّا کہ کار ممکن انت ہما کچّا حبر ۔
کمال خان شیرانی پراگریسوازم و رژنا فکری ئے چیدگ ات ۔ مئے ہندا آنہی ئے ہمے رژنا فکری ئے درگتا آ چہ وتی اہدئے ایندگہ مردماں جتا لیکگ بوتگ ۔ آ اے ہندئے چہ ہما لہتیں مردمان ات کہ آہاں وتی سرجمیں زند اے ہندا جمہوری فکرا را دیمروی دےئگ ئے حاترا وتی شپ و روچ یک کتگ ات انت ۔ آنہی ئے واہگ مدام ہمیش ات کہ بزّگیں مہلونکا بنجاہی سیاسی سٹیجا تا بہ رسینیت ۔
کمال خان شیرانی ئے سرجمیں زندپہ وتی مہلونک ئے فکری تربیتاگوستگ ۔ کتاب دوست و شپ روچ یک شلا وانوکیں اے مردا وتی زند پہ وانگ و سرپدی و پہ مہلونک ئے سرپدی ئے حاترا گشئے ندر کتگ ات ۔ آنہی ئے گوں کتاب و وانگا ہمگرنچی چمے حبراں کیاس کنگ بیت کہ ، شاہ محمد نبشتہ کنت: ’’یک رندے کمال حان ئے چکّ کوئٹہ آ منی گورا اتکگ ات تہ من یک یکّا لوگ ئے درائیں مردمانی جست کت ؟۔ آنہیا ہم یکّ یکّا درسانی حال دات انت پدا کہ من جست کت تئی پت چون اِنت ؟ تہ گشتے کہ سجّئیں روچا نشت بس کتاب وانیت ۔ 88 سالیگیں اے پیر مرد ے کہ وتی جسمانی نزوری ، نادراہی و دزگٹّیاں ابید انچو گوں علم و زانتا بندوک بہ بیت چرائی ئے ساہگا الّم اے سرڈگارا انچیں ارواہ ودی بیت کہ گوں وتی زانت ئے رژناہی آ جہانا رژنا کن انت ۔ ہمائی ئے روکّ کتگیں چراغ مروچی بلوچستان ئے کنڈ کنڈا رژناہی ئے نشانی انت ۔
کمال خان شیرانی پہ بلوچستان ئے مہلونک و پہ سرجمیں انسانیت آ راستی ئے چیدگ اِنت ۔
