میڈے وس ہووے ۔۔۔ عزیز شاہد

میڈے وَس ہووے، مَیں ترٹ پوواں
تیڈے پیر چْماں، تیڈے پندھ چْماں
تیڈے رَہ دی دْھوڑ دَھمال چْماں
تیڈی ونگ چْماں، تیڈے رنگ چْماں
تیڈیں پلکیں دی پنڑیال چْماں
تیڈے نَین چْماں، کونَین چْماں
وچ وسدی مْونجھ ملال چْماں
چْم ڈیکھاں سیندھ سندور بھری
تیڈے سِر دا ہِک ہِک وال چْماں

میڈے وَس ہووے، میں وس پوواں
تیکوں بن کے باکروال چْماں
میڈی لْوں لْوں لْہندی لمس تیڈا
نس نس دے ڈیوے بال چْماں
میڈے لْوں لْوں لکھ لکھ لب ہوون
بے انت لباں دے نال چْماں
میڈے وَس ہووے
میڈے وَس ہووے