ودار ۔۔۔  وھاب شوھاز

ہما، کہ پہ واھگے

بہ سنگاریت ڈیلا َ بانگواہ ئے

سیہ شپانی۔

بہ سوچیت لنجا

ہما، کہ نیمروچ ئے آس گواریں طبیعتا را

پہ آپ شودیت،

ہما، کہ نادراھیں بیگہاناں

بہ کنت درمان،

ہما، کہ پہ منزلا سباہ  ئے

چراگ بیت او شپاں سپر کنت

ہما، کہ گوں ماہکان ئے درنزآں

ھبر کنگ زانت،

ہما، کہ استالاں سنگتی کنت

ہما، کہ نندیت گوں پل ئے وشبوآں

ھلوتے کنت،

ہما، کہ روچ ئے

خماریں برمشانی زیملا  زانت

ہما، کہ گوں رژنا کنت دیوان

ہما، کہ کنت گوں تہاری آ جنگ

ہما، کہ شے ئے دلا  بوانیت

ہما، کہ ھانی ئے ڈیلا دربارت

ہما، کہ مھرئے  بہشت سازیت

ہما، کہ جہداں بزانت بکشیت

ہما، کہ زند ارا دروشمے دنت

ہما، بنی آدم ئے ودار ا

یک عہدے گوستگ من راہسراہاں

کہ جند ئے لوگا

چو نیم راہ ئے مساپراہاں

بلے،

جہان ئے تبا نیاہاں۔۔