نی ہچ شہے دِہ گیرنئیں
ہر ٹوک شہ گیرا شُتہ
گوئستہ مزائیں مُدتے
تودِہ ہماں اولی نیئے
مں دہ ہماں پیشی نیاں
دوذاکہ من ترا گوانجثہ
مئیں پلوا تئی دل نہ اَث
مرشی کہ تئی دل لوٹغیں
مرشی تہ مئیں دل، مئیں نئیں
نی مئیں گُر اسا ہڑغ دہ نئیں
نی مئیں کُش ئے پجوار نئیں
منتہ شہ مئیں ہمرا ہیا
نی من نزاناں کہ بکو؟
کئی سنگتئیں کئی بولک ئیں؟
چودِہ گُمانی بیئغاں
ہندے گُمانی بیئغاں
ہندے لذی آ کپتغئیں
منتہ نواں شہ رُلغا
منتہ شہ مہرئے کسوا
توآختغئے نی مئیں گُرا
نوخی ترا کپتہ سما
پجار غاں ترابے وفا
تئی بے وفائی ئے قہر
گیراں مناں، تئی آں خبر
نی میڑہ بیثوآختغئے
اشتہ شہ رنج بیثہ کسے
یہ دلبرے جوائیں سرے
نی من بلوچی یے کناں
مئیغنت جُدائیں سیستاں
لوغا آختغا حون بشک بنت
کسے کے بئیث مہمان بی
ہرشئے کہ لوٹی حاضر یں
جاں جرو جانا پجی آ
کل آختغین ئے صدقہ اَنت
ہچو نہ گڑدیناں ترا
جاں حاضریں سرحاضریں
ہڑدوئیں کہ غرض اَنت ترا
بشکنت ترامئیں پلوا
بیا رؤوں گنوخا وش کنوں
آں بے گونشتینیں دلا
تھر برجنی شوہازیا