پچھلی تاریخ وچ
اساڈے نال دروہ ہک تھیا
انہاں ساڈے قاتلاں کوں
ساڈا ہیرو کر ڈکھلایا
انہاں ساکوں جَانگلی سڈیا
آپ کوں معتبر کر بِلہایا
انہاں ساڈی بھوئیں تے قبضہ کیتا
ساڈی جد کوں پکھی واس ہْلایا
انہاں ساکوں راخس آکھیا
ول دور کہیں جنگل دو دْرکایا
انہاں ساکوں شاہر اچ سڈیا
اساتھوں تریمت کوں مندہ وی کڈھوایا
انہاں ساڈی پنج ہزار سال پرانڑیں وسوں کوں
جگ اچ جاھل ونج ھْلایا
ھنڑ اساں جو نندروں جاگے
ساکوں سمجھ ایہو آئی
اساں ساری وسوں کوں
ولدا سڈ کے چا سمجھیسوں
پچھلی تاریخ تے اوندا قصہ
ایں پھیریں بدلیسوں
اساں اپنڑیں بالاں کوں
سہی تاریخ ڈسیسوں
پچھلے دروہ مْکیسوں