ہمے صدی ئے ہشتمی دھاگ ئے آخری نیما کا بلٹز ا مقالہ اے لکثہ کہ آنہی سر حال اث”،مغزاو حواس، ترقی حیثیتا۔“ا و ہمشی اندرا سپنسر ئے پچار ا کناناں آنہیا دعوی کثہ کہ حواس، انسانہ ترقی لافا مزائیں کاراں کننت او مغزچھڑویک کستریں دومی نمبر ئے کوٹغ پاٹغیں حیثیت ئے کاراں کنت۔ یک ”شرف مند یں سوشالوجسٹ اے“ آ کا بلٹزئے ولدی داثہ و ہمنگیں خیالے چکا حیرانی درشان کثہ آں کہ مغزا ”پادانی پلوا“ ہند ہ داث۔ بے شک ”عز تمندیں سوشالوجسٹ ”مغز ئے پلوبندائی کنغامں حقہ چکا یث پر،اغر آنہیا اے ثابت کثیں کہ کابلٹز ہ ٹوٹکے پیش دارغہ ڈول چٹ بے مناسبیں تو آں زیات حقہ چکہ بیث۔ اصلا مں ”اجزا“ ئے تھیوری وث بے مناسبیں، پچیکہ آں سماجی زیندھ ئے بازیں تکاں گوں بے اصولی آ گیش ایت و گیواریث۔ آنہاں جُذائیں مڑدانی حیثیتہ داث و آنہاں یک خاصیں ڈولے ئے طاقتانی اندرہ بدلہ کنت کہ ژہ بازیں پلواں، او نا بر اوریں کامیابیاں گوں سماجی انسان ءَ دیمرئی ئے راھہ چکنت۔ پر، اے نظریہ کابلٹزئے پیش داشتگیں دروشمہ اندرااغدہ زیات بے مناسبیں کہ آ نہیا تہ سماجی انسان ئے سرگرمیانی بازیں پہناذدِہ نہ، بلکنا انفرادی ذہن ئے ڈول ڈولیں حلقہ خاصیں سوشالوجیکل مڑدمانی اندرا بدل کثغنت۔ تجرید ئے ہمے منزل بالکل ہر کولیس ئے تو نڑیانی ڈولاآخری منزل ایں۔ مردم شمیذاں اگھا اصل شتہ نہ وی، پچیکہ شمشیادیما پیلویامہمل ایں ٹوکانی ملنڈی ایں وطن شروع بی۔”شرف مندیں سوشالوجسٹا“ بایدث کہ لگھا پہ لگھائی ہمے ٹوکہ سرا کابلٹز و آنہی وانوخانی نگاہ ترینتیں۔ بیثہ بی کہ تجرید ئے ہمے ڈونگھائیانی پد ھر کنغہ اندرا، کہ دموذاں کابلٹز وثی ہسٹری ئے زوراخیں ”جزو“ ئے معلوم کنغہ کوشیشا رسینتہ، ”عزتمندیں سوشالوجسٹا“ قضائی آ ہمے اجزائے تھیوری ئے کرٹسزمہ اندرا ودھک داثہ کثیں۔ اے ہماں وختا پرماکلاں باز فائد ھی چیزے بیث۔ پر، آں ہمنگہ کنغئے لائخانہ یث۔ آں وث ہمے نظریہ ئے منوخے اث اوکابلٹز اژہ چھڑواے ڈولا جُذا اث کہ آنہی دل، الیکٹسزمہ پلوایث۔ ہمے خاترا ا ٓنہیا سجہ ایں ”اجزا“ برابر برابری ءَ مزن مانا تکنت۔ پذا آنہی مغز ئے الیکٹسزم پسندیں طبیعت ئے خاصیں ڈولااکیلائیں اظہار، ڈائلیٹکل میٹیریلزمہ سراآنہی حلمہانی اندرا بیثہ۔ ڈائلیٹکل میٹریلزم آنہیا ہمنگیں عقیدہ اے گنڑاِث کہ آں، باقی سجہ ایں جزو اں معاشی جزو ہ چکا قربانہ کنت۔ آ ں تاریخہ اندرا نفر ئے کردا زیرو آ ژہ زیات حیثیتہ نہ داث۔ ہمے ”عزتمندیں سوشالوجسٹا“ اے خیال دِہ نیاتکہ کہ اجزائے تھیوری ڈائلٹیکل میٹیریلزمئے طبیعت ئے خلاف اَیں۔ کہ چھڑوہماں مرد ڈائلیٹکل میٹیریلزمئے اندرا تسلیم و رضا ئے عقیدہ (Quietism) ئے جوازے دیثہ کنت، آں کہ منطقی ڈولا فکرہ کنغئے لائخامہ وی۔ ہمے بارہا اے گشغ ضروری ایں کہ مئے ”عز تمندیں سوشالوجسٹا“ ژہ ہماں غلطی کہ بیثہ آں چھڑو ہمشیا نہ کثہ بلکنا بازیں دُہمی مڑداں دِہ کثہ، دانڑتی دِہ بیغیں اوغالباً آئندہ دِہ بیاناں روث۔
میٹیریلسٹانی چکا تہ ہماں وختا دِہ ”Quietism“ ئے پلو ا لاڑوبیغ ئے سیاہغ جنے جیثغنت وختیکہ آنہاں دانڑتی وثی فطرت و تاریخ ئے ڈائلیٹکل تصور ئے ترتیف و دروشم دِہ نہ کثغث۔ ”زمانہ ئے ڈونگھائیانی ”سیل و سوادھ کثیا بغر“ بیائیں کہ مامشہوریں انگریز سائنس دان پر یسٹلے او پرائس ئے نیاما بیثغیں بحث ئے گیراوندیا تازہ کنوں۔ پر یسٹلے ئے تھیوری آنی تجزیہ آ کناناں پرائسا، اے دعوی دِہ کثہ کہ میٹیریلزم اختیار ہ تصور ئے دژمنیں، او اے کہ اشی اندرانفر ئے وث واکیں کار ئے ہچ گنجائش نے۔ اشی پسو ا دیاناں پریسٹلے آ روزینہ ای تجربہ حوالہ داتہ۔آنہیا لکھثہ ”مں کہ بہر حال یک بے ساہ و کپتگیں حیوانے نہ یاں، وثی ٹوکا نہ خناں، من اَشتہ پولا کناں: تہ ژہ اشیا زیات دل ہیڑت و گرم جو شیں، ژہ اشیا زیات تکڑا، اولازمیں مقصدانی،ژہ اشیاآ زیات ڈکھیا ئیں پٹ و پولا پکو گندئے ہما نکر کہ ہما مردانی اندرادیثہ کیث ہماہاں کہ آں پجھہ کاری کہ جبر ئے عقیدہ ئے منوخنت؟“۔ پریسٹلے ئے نغاہا ہماں مذہبی جمہوری اِیں فرقہ اث کہ جبر ئے عقیدہ ئے مسیحی مریذانی (Chirstian Necessarians) ناما مشہور ث۔ مار اے سمانَیں کہ ہما فرقہ ہمے سندھو آ باعمل اث یا نہ ہمانکر کہ پریسٹلے آ گنڑث، پر اے ٹوک لازمی نَیں۔ ایشی بارہا کستریں شک دِہ کثہ نہ یئے کہ انسانی ارادہ ئے میٹریل تصور جوش والائیں عملی کار اگوں پیلوی ءَ ہم گرنچیں۔ لانسن گشی کہ ”ہما سجہ ایں عقیدہاں، کہ انسانی ارادہ ئے جہد و عمل ئے لوٹوخ اثنت، اے دعوی کث کہ ارادہ بے وسیں۔ آنہاں اختیار ئے عقیدہ ردکثغث او دنیا قضا و قدر (Fatalism) ئے محتاج کثغث“۔ لانسن اے گنڑغہ لافا غلطی سرااث کہ ہما ں چیز ا کہ آجوئیں ارادہ (اختیار) گشنت آنہی ئے ہر تردید تقدیر پرستی (Fatalism)ئے پلو ا باڑت، پر ہمے غلطی آنہی ئے یک باز دلچسپ ایں تاریخی حقیقتے پلو ا دلگوش کنغامں اڑنویثہ: اصلا مں ہسٹری ڈسی کہ فاٹلزم دِہ یکو زورا خیں عملی سرگرمی ئے دگ ئے اڑ نویثہ بلکنا کڑدے زمانہانی اندراتہ آں ہمنگیں سرگرمی ئے واسطا نفسیاتی بھیرے آ لازمی بنیادے اث۔ اشی ثابت کنغا پہ ماپیوریٹن فرقہ ئے مثالا پیش داروں کہ زور ئے لحاظا ہبدہمی صدی انگلینڈ ئے سجہ ایں پارٹیاں ژہ گوئستیا یث۔ او محمدؐ ئے منوخانی مثالا دوں کہ آنہاں یک گوئنڈیں وختے اندرا ہندوستانا گِردَہ سپینا، گل زمین ئے یک مزائیں بہرے وثی پاذانی شیرا آڑتغث۔ہماں مردم کہ اے گنڑنت کہ پرما واقعہانی یک خاصیں سلسلہ اے ئے لازم بیغئے قائل بیغ پہ اے ہبر ا کھوڑیں کہ ماوثار ہمے واقعہانی اندرا کمک بیوخ یا آنہانی اگھہ گرغ ئے سجہ ایں امکانا ژہ بے نصیو کنوں، بالکل غلطی سراانت۔ (1)۔
ایذا ہر ٹوک ایشی سرا ایریں کہ آیا منی کار لازمیں واقعہ آنی زنزیر ئے یک لازمیں کڑی ئے استیں یانہ۔ اغر استیں تومنی دودلوئی ہمکر کم بیث اومں ہمانکر زیات پکوئیں ارادہا گوں کار ا رواں باں۔ او ایشی اندراحیرانی ئے ہچ ٹوک نیستیں: وختیکہ ماگشوں کہ یک مڑدے وثی کاراں لازمی ایں واقعہ آنی زنزیرہ لافایک لازمی ایں کڑی ئے گنڑیں تو، مئے مطلب اے بی کہ ہمے مڑد ءَ نزدیخا واکہ ارادہ ئے ہمے ناموجود گی آنہی مغزہ لافا اے ڈولا پیہی کہ آں ہر ڈولے آ کہ کار ا کنغیں شمانہیا جذائیں ڈولے آ گوں کار ا کثہ نہ خنت۔ اے بالکل ہما ذہنیت ایں کہ آں لوتھر ئے اے مشہوریں ٹوکاں گوں ظاہر بی: ”مں اشی چکا جکثی آں۔مں اشیا سواد وہمی ہچ کارے کثہ نہ خناں“۔ او شماں ذہینیت ءِ برکتا کہ مخلوک باز زبریں زور او طاغتا درشان کننت، حیران کنوخیں اکیلائیں کاراں کننت۔ ہیملٹ ژہ ہمے ذہینیتا پوک اث، ہمے سببا آں چھڑو گریغ وپٹغ او گنڑتی وپکر کنغئے لائخا اث۔ او ہمے سبب ایں کہ ہیملٹا ہچبرہمنگیں فلسفہ اے قبول کثہ نہ کث کہ نزدیخا اِش واک چھڑو ہماں جبریں کہ شعور ئے دروشماں بدل بیثہ۔ فشٹئے آ بالکل راست گوئشتہ: ”ہمانگیں کہ انسانے بیث ہماں ڈولیں آنہی فلسفہ اے بیث“۔
ورداس
۔1۔ اے مشہوریں ٹوکے کہ کالون ئے نظریبانی رد ا انسانانی سجہ ایں کارژہ خدا ئے پلو ا مقرارین انت۔ (قضا وقدر ا ژہ مئے مطلب ہذا ئے منشاایں کہ شمانہیا خدا اے فیصلہ آ کنت کہ ہر مڑدمے آ لازمی ڈولہ چے چے ڈائے بی۔ ہمے نظریہ ئے ردا ہذاوثی کڑدے بندغ چونڈ ہ کنت کہ آں بلاں نا انصافیا ژہ لتاڑتغیں قوماں آجو کننت۔ ہمے ڈولیں یک بندائے حضرت موسیٰ ؑاث کہ بنی اسرائیل آجو کثئی۔ ہر ٹوکے آژہ اے اندازہ بی کہ کرا مویلا دِہ وثار یک ہمنگیں ھذائی مقرار کثغیں مرڈے گنڑث۔ آنہیا یکووثی عمل ھدائی اراد ہانی نتیجہ گوئشتنت او آنہیا ایمانداریا گوں ہمے ٹوکہ سر ا ایمان داشت۔ آنہی واسطا کلے کارانی چکا نصیو ئے مُہر جنوخث۔ پرہمے چیز ا آں دھک مں دھکی سوب گرغ ئے کوشیشاژہ نہ داشتہ بلکنا آ نہیا ہمشی گرغ ئے کوشیشارایک پروش نہ وروخیں طاقتے بشکثہ۔