ہیگل یک ہندےءَ گشی کہ سجہ ایں مزائیں تاریخی حقیقت او مزں شانیں مردم دودھکا ظاہربنت۔ آں ہمے ٹوکہ اندرا سیمی ٹوکہ اوار کنغہ شمشی: یک دھکے ٹریجڈی ڈولا، اور رندا مسخرہ ئے ڈولا“۔ کاسیؔ دیئر ڈینٹنؔ ءَ ہندا،لوئیؔ بلا نک رابرؔ سپائرے ءَ ہندا، 1848-51ئے ”ٹیٹر“(2) 1793-95 ئے ”ٹیٹر“ ءَ ہندا،براز تک بابا ہندا۔ہژدمی برومیئر ئے اے دوہمی ایڈیشن دِہ ہمنگا ایں (3)۔
مردم وثی تاریخہ وث ٹاہین انت، پر آں اشی ءَ دارہیں گُذ ءَ گوں نہ ٹاہینی: آں اشی ءَ وثی جند ہ چونڈ کثغیں حالتانی شیرءَ نہ ٹاہینی، بلکہ ہمنگیں حالتانی شیرا کہ آں پیشا ژہ موجود بنت۔ سجہ ایں گوئستغیں نسلانی کثغیں چیز زیند غین ئے مغز ءَ چکا یک مزائیں ٹیڑے کچیں وزنے داری۔ اوبالکل ہماں وختا کہ مڑدم چیزاں اووثی جندا انقلابی کنغامں مانا تکیا گِندغ بنت، اوہمنگہ کنغا پہ تیار بنت آں کہ پیشاہچبر نہ یث،انقلابی بحرانانی ہمنگیں دورو باری آں ماضی ئے روحاں وثی واہرا پہ سورنت۔آنہانی پیشی ناماں زیرنت، ہما نہانی جنگی نعرہ آں او پوشاکاں زیرنت تاکہ ماضی ئے، مقدسیں پوشاکانی اندرا او پنڈثغیں زبانہ مذتاگوں آں دنیا ئے ہسٹری سٹیجہ چکا نوخیں سوادھے پیش دارنت۔ ہمے خاطرالوتھرا ؔحضرت پالؔ ئے ویس کثہ، 1789-1814ئے انقلابا وختے رومن رپبلک ئے او وختے رومن ایمپائر ئے جرجانا کثغنت۔نَیں کہ 1848ئے انقلابا سما اث کہ یک وختے آ 1789ئے ملنڈوڑی ایں ڈائیں او دوہمی وختا 1793-95 ئے انقلابی روایتانی ڈائیں کنغاسوا دوہمی تاں کار جوآں تریں؟۔ اے ہمے ڈولئیں چوکہ کسے یک نوخیں زبانے ھیل گیڑت تو دھک مں دھکی آنہی ٹرانسلیشناوثی جندہ زبانہ اندرا کناناں بروث۔ داں وختیکہ آں وثار ٹرانسلیشن کنغئے وزتہ ژہ آزادنہ خنت او داں وختیکہ آں نوخیں زبانہ گزرکنغہ وختا وثی ماثی زبانا دلاژہ کشی نہ،دھماں وختا نوخیں زبانئے نَیں روح آنہی گرفتہ کئیث او نہ آں ہمشی ءَ وستاذبیثہ بی۔
وختیکہ ہسٹری اندرا مڑتغیں روحانی ہمے سورغاہیڑتی آگندئے تو فوراً ہمشانی نیامایک مزائیں فرقے اگھہ کیث۔وختیکہ کاملےؔ ڈیسمولین، دانتن، رابسپائرے، سینٹ جَسٹے، نپولین ءَ ڈولیں ہیرو،او کہنیں فرنچ ریوولیوشن ءَ پارٹی اوعوام وثی زمانغئے مزنیں فرضہ ادا کنغاپہ کڑوبیثغنت۔ تاکہ نجات او ماڈرن بورژوا سماجا قائم کننت توآنہاں قدیمیں رومن جرجانا کثغنت او رومن بولی آکناناں ہمنگاکثہ۔ یکے آ تہ انگا کثہ کہ کہنیں فیوڈل بنیاد بھورینتؤ جھور ینتہ او ہمشی چکا مورثغیں فیوڈل سر گڈ ثغنت؛نپولینا فرانسہ اندرا ہماں حالت پیدا کثغنت کہ چھڑو ہمانہانی شیراآزادمقابلہا رذ ومہ کثہ کث، بہر بیثغیں ڈغار آبادکثہ کا تکنت،انڈسٹری ئے پیداوار ءِ قوم ئے بُتکہ زنجیریں طاقت استعمال بیثہ بیثنت۔ او فرانسہ سرحداں شاں پلوا آنہیا دوہمی فیوڈلیت ئے صورت ہمنگا بوہاری داثؤ ختم کثغنت داں حدّءَ تاکہ فرانسہ اندرا کڑوبیوخیں بورژوا سماجی نظام ءِ اے غرض پیلہ بیث کہ یورپی کانٹی ننٹا وخت ئے تقاضا مطابقا مناسبیں حالت پیدا بی انت۔ یک برے کہ نوخیں سماجی صورت وثی پاذاں اوشتا رینغ بیثہ، تہ گڑہ کہن و دقیانوسی دے اوبلا گم و گمبھا ربیثغنت، او ہما نہانی پجی آ،دوارزندہ بیوخیں دنیا۔۔۔ بروٹس، گراچی، پبلی کولا، ٹربیون، سنیٹرز، او سیزر وث دِہ۔ وثی گراں مہذبیں حقیقتہ اندرا بورژوا سماجا سیئی، کوزین، رائیر۔کولارڈ، بنجمن کانسٹانٹ اور گیزو ڈولیں وثی جندہ راستیں ترجمان پیدا کثغثنت، وثی جندہ اصلیں جنرل کہ آفس ئے میزانی مُسکا نشتی ایثنت۔او ہمے سماجئے سیاسی سروک اث کور مغزیں لوئی ہژدہم۔ نِیں ہمے سماج کہ دولت ومڈی ئے پیداوار، او مقابلہ ئے پرامن ایں مقابلہ اندرا پیلوی آجذب اث، ہمے سماج نِیں اے ٹوکہ پوہ بیثہ نہ ویث کہ روم ئے روشانی جن وبلا آں آنہی گوانزغہ چوکیداری کثغ اث۔ او، بورژوا سماجہ اندرا ہیروازم ہرچی کہ کم بی،پرگڑہ دہ وثار دنیا اندرا آرغاپہ، اشی ءَ ہیروازم کنغی بیثہ، وث قربانی دِہ،دہشت دِہ جاری کثہ، خانہ جنگی اوخونی ایں جنگہ پڑاں دِہ او شتگی بیثہ۔ بورژوا سماجئے گلیڈی ایٹراں رومن رپبلک ئے سختیں کلاسیک روایتانی اندرا ہماں آئیڈیل، آرٹ ئے ہماں صورت، ہماں خود فریبی دِہ رستغنت، کہ آنہاں خاص اے مقصدا پہ درکار اثنت کہ وثی جُہدانی اندرا ہماں بورژوا مجبوری او مصلحت کہ استنت آں اژوث ہم او ڈھربی انت ، او یک مزائیں تاریخی ٹریجڈی اے ءِ چُومبی آداں آنہانی حوصلہ بڑز دار غ بنت۔بالکل ہمے ڈولا، یک صدی اے پیش،ترقی ئے یک دوہمی مرحلہ اے چکا، کرومویل او انگریز عواما وثی جندہ بورژوا انقلابا (4)پہ او لڈ ٹیسٹا منٹا (5)ژہ زبان، حوصلہ او وہم کشتؤ آڑ تغ اثنت۔وختیکہ اصل کار درکپتہ، وختیکہ انگلش سماجئے ری ماڈلنگ پیلہ بیثہ،تو گڑہ لوک (Locke) آ ہباکُک (Habakuk) تُڈثؤدرا کثہ۔
ہمے ڈولا، ہمے انقلابانی اندرا مُڑدغیں روحانی اغدہ زیندغ کنغا نوخیں سٹرگلانی سارائینغ و مزں شان کنغئے کا رداثہ،نہ کہ کہنین ءَ چکا ملنڈ کنغئے۔ اشیا مقراریں کاروفرض ءَ خیال مزن کنغ وپیش دارغئے کار کثہ، نہ کہ، اشی عملی حلا ژہ پیش پذ گڑدغ ئے۔ اشیا انقلابی جذبہ ئے اغدہ تازہ کنغہ کارکثہ، نہ کہ اشی بدروحہ آزاد کنغئے۔
ورداس و ریفرنسز
لوئی بونا پارٹئے ہژدمی برومیئر
فرانسا 1848آ گِرداں 1851آہماں انقلابی کار کہ بیثغنت آنہانی ہیڑ گندی آ مارکسہ اے کتاب آنہی جند ہ نوشتانکانی لافا باز ارزشتہ واژھیں۔ ایذامارکسا تاریخی میٹیریلزمئے سجہ ایں قانون بزاں کلاس سٹرگل،او پرولتاری انقلاب،سٹیٹ اوپرولتاری ڈکٹیٹری ئے نظریہ زیات ہیڑتی ءَ بیان کثغنت۔ پرولتاریہ بوژوا سٹیٹاگوں چے بہ کنت،ہمے بحثئے مارکسا ہماں نتیجہ کہ کشتہ آں بے مثال ایں اہمیتے داری۔ مارکس گشی کہ ”کُل ہمے مشینہ پروشغہ ہندا اشیا غدہ زیات تکڑا کن انت“۔مارکسہ ثابت کثغیں ہمے نتیجہ ءَ بارہا لینن گشی کہ ہمے سٹیٹ ءَ بارہا مارکسی سبقانی سک بنیادی ٹوکہ۔
۔Montagne Party۔ (1790 آگِرداں 1793)آ۔ہژدمی قرنئے آخری سالاں وختیکہ فرانسیسی بورژوا زیا انقلاب آڑتہ،ہماں وختاں نیشنل کنونشنہ اندرااے یک انقلابی ڈیموکریٹانی ٹولی اے اث۔ اے نام اے حاطر ا بیثئی کہ آں میٹنگہ وختا کنونشنہ ژہ بڑ زی کرسیانی سرانشت انت۔
برومیئر۔ اشی مطلب ایں فرانسہ رپبلکن کیلنڈرءِ یک ماہ۔ ہژدمی برومیئر بزاں 9نومبر1799ئے ہماں روش کہ نپولین بونا پارٹا حکومت چپی کثو وث فوجی ڈکٹیٹر شپ جثہ۔ ”ہژدمی برومیئر ئے دوہمی ایڈیشنا“ ژہ مارکسہ مطلبیں دو دسمبر1851ئے انقلابی حکومت۔
17می صدی اندرا انگلینڈ ہ بورژوائی انقلاب۔
اولڈٹسٹامنٹ۔ بائبلئے ہماں مزائیں بہر کہ پیغمبر و قانونانی کتاب اوارنتی۔