دُنیا ئے شہ زانو گراں
او رُژن گواریں مہتراں
کچکولوں زانت ئے ہوراگ اِنت
فکر ئے ڈگاروں سورگ اِنت
بخشِت منا را پنڈگے
زانت ئے وتی یک ذَرّگے!۔
فِکر اِنت شمے دیما بَران
دُنیا ئے درُستیں مَردمان
من بَزّگ و بیچارگیں
قومِ بلوچ ئے رَہبراں
شیر و مزارئے دَروَراں!۔
راج ئے بلے بازیں غَماں
عیشی سرئے ہوشوں شُتگ
آساں ماں دَزموشوں کُتگ
مینے آسِلّیں کپتگاں
ہَیچی نزاناں چوں کناں
بَزگ کن اِت زانوگراں
اِے بزگیں قوم ئے سرا
دَستے شہارت پمنا
ندراں شمے من سدبرا
زانت ئے دَئت چُنڈے منا
فکر ئے دئت دانکے منا
اورُژن گواریں مہتراں
زانو گراں! زانو گراں!۔