بیا دمانے بِنند گپ و گالے کناں
وابے نوکیں گؤپاں پچ ھیالے کناں
زانی بندے کناں کاپر ئے ساھگا
چے ھبر، نوبتانی بیا ھالے کناں
قرنئے دراجیں گمانی گشاں قصّہاں
روچاں ماہے کناں ماہء َ سالے کناں
مئے دلا گیرکاینت دمگ، مچکدگ
بیا کپوتانی ہمبراہا بالے کناں
گوں زئیرئے سروزا گوں درپئے نلا
سرشپا دانکہ باما دمالے کناں
من چہ استالاں سوجیگراں منزلئے
ماسگے بْن دیاں شرک و پالے کناں
دیدگاں برمش بندیت روچ زردگان
بیگہے پر وتا زوراں شالے کناں
نوکیں دابے دیاں پگرِیریسان باں
لبز و شعراں گوں انچیں کمالے کناں
شانتلانی دلئے سارت و ایکیمی آ
زوراں برّ ئے کہْورا چنالے کناں
ملکموتا گوں دستیمڑاں ملّی ایں
نوکیں ارواہے کاراں نہالے کناں
قیامت اِنت پرچہ شوھاز اِمروز مئے
محشر ا اچ ھْدا آ سوالے کناں