بڑئیں شاہ محمد مری۔۔
دروت و دراھبات!۔
نامداریں دانشور! تئی وانوک وش و جوڈ انت، امیت انت کہ تو ھم سلامت بہ ئے۔
مئے وش بہتی انت کہ ما تئی دور ئے مردم انت، مرچی اگاں مئے رنگیں بے علمیں مردمے چندے شعوری گپ یا کہ لبز نویسیت، گڈا آ تئی شعوری زانت ئے برورد انت۔
مناں چونائی آ دیر انت کہ تئی مرید انت، اے نادرائی آمناں ھما وھدی گور جت کہ من دہ ئے کلاس ئے نردربر اَت انت او تئی اولی کتاب من ونت۔ مرچی تئی بازیں کتابانی وانگا پد نی من شموشکار اں کہ ھما اولی کتاب کجام اَت کہ آئی آ مناں تئی نیمگہ َ انچو چِک اِت کہ "چین آشنائی” آ بگر داں "مستیں توکلی” آ درا درست مناں چو ساہا دوست بنت۔ او آیانی رداں (جملہ) وتی زہن ئے تہا ورد کنگ ئے جہد کناں۔۔۔ (یک مریدے پہ مرشدا دگہ چی بکنت؟)
مناں دیر انت کہ پہ ترا نمدی ئے نویستگ اَت، بلے پدا من آ پمشکہ درت و گوات آماچ کت کہ مناں ہمت نیست اَت، تئی (بے بکش مئے دمگے بلوچانی گورا چو اردو والاں "آپ” نیست۔ پہ ہرکسا "تئی تو” کارمرزکن انت) دابیں دانشورے آ منی رنگیں بے علمیں ورنائے کاگد بہ نویسیت۔
بلے واجہیں مری! مرچی تئی دو کتابانی دیم پہ دیمی آ پد من مجبور بوت اَنت کہ پہ تو کاگد ے بہ نویساں۔ اسل ءَ اے جیڑہ لک وڈ (رسم الخط) ئے جیڑہ اِنت، مناں اے پڑ ا ھچ وڈیں سرپدی نیست۔ بس بے علمیں وانوکی ئے صورت وتی گپاں ایر کناں۔
استیں وھد اتئی دو کتاب منی دیما ایر انت، یکے "کاشذ” او دومی ” جہان جکسیں دہ روش”۔اے دوئیں کتاب بڑئیں مرد! تئی کلم ئے رژنائی ئے تواناگوں رجانک بوتگ اَنت۔
مناں سک دیر انت کہ تئی بلوچی کتابانی وداریگ بوتگ اَنت، اے دوئیں کتاب کہ مناں سنگت ویب سائٹا چہ دست کپت انت، تاں من گلا بال بوت انت کہ نوں منی او شاہ محمد ئے درمیانا دگہ زبان ئے میلانک نہ بیت۔ بلکہ ما وتی ماثی زبان ئے تہا دریں گفتاراں ایر بران بہ انت۔
اے دوئیں کتاب من پہ چم و دل ونت انت، بلے کاشذ ئے تہا گشے زاناں مناں یک شے ئیمان اڈینان اَت، او "جہان جکسیں دہ روشا” اے جیڑہ نیست اَت۔ او آئی ئے روانی انچش برجم اَت کہ یک آپ ئے تچوکیں شاہ کورے آ چہ بگوزیت۔
نو منی اندر لاشعوری صورتا ایک ھتم نہ بوئکیں جیڑگے ئے تہا کیز بوت کہ۔۔۔۔۔۔ دوئیں کتابانی نوشتہ کار شاہ محمد انت، ھما شاہ محمد کہ من آئی آ نان فکشن ئے دوستیگیں نوشتہ کار سرپد بنت۔ آ کجام سبب انت کہ اے جیڑہ ودی بوھگا اِنت۔
پدا کہ من اے جیڑگا را شعوری صورت بکشات، او دوئیں کتاب دیم پہ دیم کرت انت، تاں سما کپت کہ اسل جیڑہ ناں شاہ محمد ا اِنت او ناکہ مناں۔۔۔۔ بلکہ اسل ھما لک وڈ ئے "سمبولک” اَنت کہ مردما مان اڈین اَنت
گڈا واجہیں شاہ محمد!۔
نی تئی ھیال چی انت؟ تو اے صورتا وتی وانوکاں حیران کنگا نہ ئے؟ تو بلکہ سرپد بئے کہ من ” غ، خ اوث او دگہ لوزانی گپا اوں ناں ھچبر ناں، ث مناں چو بلوچ "ماثی” آ دوست اِنت او غ او خ چو غنوخیں "مست” آ۔۔۔۔
بلے واجہ ” ءُ، ءِ، ءََ ” چہ شموشکار مہ بو، اگاں کسے بلوچی آ روانی دات کنت گڈا آ ” ” ئے کارمرزی انت، اے گپ چہ تئی منی دیماایر دوئیں بلوچی کتاباں چہ پدر انت۔کہ کاشذ ئے تہا تو اے "سمبولک” کارمرز نہ کتگ، او جہان جکسیں دہ روچ ئے تہا کرتگ انت، پمشکہ کاشذ ا چہ ” جہان جکسیں دہ روش ” وانکاک تر انت۔
منی دوستیگیں نوشتہ کار! منی رنگیں بے علمیں مردمی ئے چی بسات کہ تئی وڈیں رژنائیں روچی آ لنکک پیش بداریت۔۔ بلے اے وانوکی ئے تجربت انت کہ تالان کرت انت، من نلوٹ اِت کہ اے منی دل ئے تہا گْک بہ بند اَنت، دگہ کار زاوالے ئے بکن انت۔
واجہ! مناں گوں ترا دگہ بازیں گپے است،آیاں دگہ کاگدی ئے تہا کن انت، مرچی ھمنچو بس انت،اے نمدی ئے پسو ا سنگت ویب سائیڈ ئے تہا یک وانوکے ئے بستار ا وانگ لوٹ انت۔
سلامتی پہ ترا ڈاکٹر
تئی ند پہ زباناگیشتر سوگو بات
تئی پسو وداریگ
تئی مریدے