وھاو

    آنہی ئے لاغریں بت لافا گش ئِے کہ مزائیں طاقتے آختغ اث۔ آنہی آ یہ سٹّ آ گوں دست پاذاں جثغیں نیل کڑی بھورینتغ انت۔ کڑیانی بھورینغا پذا ایشی آ یہ ساعتے ہمیشانی نیغا دیثہ۔ کمیں چپّی آ دیثو یہ بشکندغے داث ئی۔ چیاریں پلواں گندغا پذ ایشی آ نیل و کڑی دست پھرّا لوڑ داثغ انت۔رمبانا رمبانا کمیں دیما شثو جکثہ۔۔۔۔کمیں سوچثو پذا گڑتہ۔ ہماں پرینتغیں نیل کڑی زڑتغ انت ئی۔
نیل کڑی کوفغا لڑک کثو اے نی پدیئغ اث۔ کسانی آ پذا اے اولی دھک اث کہ پدیئغ اث۔ ایشی آ وثی کسانی گیر کثغ اث کہ چوں سنگتاں گوں بھیٹ کث اثیں۔نی پدیئانا پدیئانا باغے آ سر بیثغ اث۔ ایشی آ وثی رَندا کپتغیں شاڑتہ شموشتغ اثنت۔ پاذاں پاشواذی آ دائیں باغ لافا ٹِہنگاں دیانا ماروغ اث۔
ہڑچی باغ لافا روانا روغ اث، باغ ایشی آ ونڑاناں روغ اث۔چی یے دیر بزیں گ±لانی وٹا وڑ وڑیں پِرّکانی جھارے درینے ئے پاراں دیئغ اث۔پِرّکانی گندغا پذا ایشی آ را وثی کسانی ئے سنگت اَلِیّو و شہدران یاد آختغ انت۔” کئیزاں مرشی اَلِیّو و شہدران ایذا بیاختین انت تہ ما پِرّک گپتیناں۔۔۔۔!” اے ٹوکا پذ ایشی آ را تِی خیالے آ بیڑثہ، کمیں مونجھا بیثہ۔۔۔”اِنا۔۔۔! من پچے کسے آزاتی آ پلاں؟ بلاں پرک بال کننت۔۔۔۔زیند ئے چسّاں زیرنت۔”
ایشی آ اغدِہ تشغ و ٹِہنگانی دیئغ شروع کثہ۔ گش ئِے کہ آزاتی آ ایشی آ یہ نوخیں زیندغی یے داثغ اث۔۔۔ٹہنگاں دیانا روغیں کندانا۔۔۔” ہا! آزاتی ہمیش ایں۔۔۔۔ مئے زیند۔۔۔مئے دستا۔۔۔!” نی ٹہنگاں گوں اواری آ گوں وث آ ٹوکاں دِہ کنانا روغ اث۔دستاں مرگانی بانزلانی ڈولا جہل بڑز کنغ اث، گش ئِے چو مرگے ڈولا بال آ ایں۔
اغدِہ پرّکی جھارے دیث ئی۔۔۔ کندانا کندانا گواں جث ئی۔۔۔” بیا ایت پرکاں۔۔۔۔! زیند و آزاتی ئے وش و ساڑتیں ساعتاں لوچوں۔۔۔”اے ٹہنگاں دیانا پرّکاں شہ گستہ۔۔پرکاں ایشی پلوا دلگوش نہ داثہ، آں وثی زیند ئے وشیں ساعتاں مانڑغ اثنت۔کس ایشی گوانکا نیاختہ۔اےدیما روانا دائیں پذا گندغ اث کہ نواں کسے آنہی گوانک آ بئیث۔ پذا گنداناں اےدیما روغ اث کہ ٹھابڑثو کپتہ۔
ٹھابڑغا پذ کوفغ آ لڑکیں نیل و کڑی گڑدن ، پاذ و دستاں مان آختغ انت۔خیال کث ئی تہ دیث ئی ہماں کہنیں کوٹھی و گنوخیں سنگتا گوں بھوتار ئے قید خانہ آ بستی ایں۔ایشی سنگت آ دیثو پول کثہ۔۔۔” تئہ بے سریں مڑدے ئِے مگر ہر کذیں تئہ وھاو روئِے۔۔۔من گنداں تئہ بشکندغاں دیئِے۔۔۔کندئِے، تئی دیم جوان مان کئیث، گش ئِے تئہ خوش ئِے۔۔! ہمیشی ئے چے سوب ایں؟” آنہی ٹوک ایشی آ وش نیاختہ۔ جھٹے آ چپ کثو گشت ئی "من آزاتی وھاواں گندغاں۔۔۔۔! زِیث روشے کئیث واژہ مئیں فرمانبرداری آ شہ خوش بیث، مناں آزات کنت۔ تئی گِر و اڑیانی سوبا شہ ہڈ ہمیذا گل انت۔
ایشی ٹوک کنغ رندا گنوخ چی یے خیال آ کپتہ۔۔۔کمیں سوچثو گشت ئی ” آزاتی وھاواں گوں دست نئیث۔۔۔! ہاغہہ بی اگر آزات بیئغ لوٹ ئِے۔۔۔آزاتی حقیقتے۔۔وھاوے نئیں۔۔۔ اے قربانی لوٹی۔۔! ” ایشی ٹوک پیلو بیئغ آ شہ پیشا آنہی آ زہر کثو گشتہ ” مئیں وھاو دروغیں وھاو نہ انت۔۔۔۔! اے آزاتی ئے مستاغری انت۔۔۔تئہ گنوخے ئے واژہ ئے نافرمانی کن ئِے ، تئی نصیو ہمے سیاہیں کوٹویں۔۔۔!” ہڑدوئیناں یک دوہمی آ ہر روشی ڈول آ گندان آ دیم دوہمی پلو آ کثغ انت۔
وھاو لافا ہرّو نوخیں باغے گندغ و ٹہنگانی دیئغ آ آنہی دل آ را چھرو گڑد ئے یہ حقی ئیں خواہشے پیدا کثغ اث۔ نی نافرمانیں باندی آ گوں ایشی ئے دل مان نیاخت۔ آنہی آ اگر ٹوکے کثیں دِہ ایشی جواب نہ داث۔
اے صحو ئے وختا وھاوے گندغ اث کہ ایشی مسک آ لٹّ آ سٹکا اِشتہ۔۔۔ ایشی آ زانتہ کہ اے پک ہمے گنوخ ئے شِریں کہ مئیں حقی ئیں وھاو آنہی آ را ونڑغ آ نہ انت۔۔۔۔۔۔”مرشی ترا چوبدار دستا پسکا یے دیائناں۔۔۔گاریں لغور!” مسک آ گھرڑاناں دیث ئی تہ چوبدار جند ایں۔” تئی سنگت تام ایں۔۔۔؟” چوبدارا بڑزیں توار ا گوں پول کثہ۔ایشی آ اِنگو آنگو دیثہ تہ کوٹھی آ را گڑکے اث۔زانت ئی گنوخ تختو شثہ۔ ہمے ساعتا واژہ گوں شاڑتہ آں پجثہ۔ ایشی آ دلا زانتہ ” مرشی ایشی آ را فرمانبرداری ئے انعام وتختغیں قیدی آ را گرغ آ پذا سزا مِلیث۔”
"تئہ ! وھاو لاف آ پچے کندغ اث ئِے؟” چوبدار ا پول کثہ۔۔ایشی آ دستاں بندان آ گشتہ ” بھوتار! من وھاوے گندغ اثاں۔۔۔””چونیں وھاوے”واژہ آ پول کثہ۔” واژہ چی یے روش بیثہ من آزاتی ئے وھاواں گندغاں!” قیدی آ جواب داثہ۔
"ایشی آ ٹنگ ایت کہ برّیں وھاواں گندغ ایں۔۔۔!” واژہ آ حکم داثو بھِیڑثہ۔