( سپین ء اندرا رپبلکن آرمی ئے پروشا رندا لکھثئی۔ اے شئیر فرانس ء اندرا پیہوخیں سپین ئے مہاجرانی تصویری خبرنامہ ءاندرا یکدم تیار بیثہ ۔ وپٹساروف ئے زالا لکھثہ کہ ” وپٹساروف خاص کں یک ورنائیں زال ئے دیم آ ژہ متاثر بیثغہ ۔ آں چُکانی گاڈی اے دھکوآں دیغایث او زورا بستغیں جوڑاں گوں دیماگنداناں روغایث ۔ آنہی منتغیں او دنزوئیں دیم باز بہادری آ گوں مضبوطی آ ڈسغایث۔ ”ما مڑائی برائینتہ، مئیں دوستی ایں مڑد مڑتہ ، پرتہ اے گنڑغہ اندرا غلطی آ کنغائیے کہ تہ مار پروش داثہ۔ مں وثی مڑدئے جنگ ءجاری داراں“)۔
ایڈریس :سینورا
فراسسکا
ہونیسکا
ماث!
فرنانڈس کشے جیثہ
فرنانڈس
مڑتو پورے جیثہ
فرنانڈس
نِیں نیستیں
فرنانڈس
ڈغارہ شیر اوپتی اَیں
میڈرڈئے
دری کنڈا
آں ا کھر جوائیں مڑدے اث، مناں ڈس
آنہاں پچے زیندھ اِش گوئنڈارتہ؟
نِیں مئیں فرنانڈس سوب بیثہ
تہ گشئے دانڑتی دہِ آ ں درکفنت پہ مڑغا
ماث !چھڑ وگوں تو
مں وثی غمانی پیچاں یلہ کثہ کناں
تراسمائیں جنگ چے ناں،
اواِشی لافا چکھر باز انڑس بہنت
مں ہمدردی ئے نشانیاں پولاں
دوہمی زالانی چمانی تہا،
پراوذا دِہ گنداں تلخیں مونجھاں
او انڑس ، تازگیں انڑس ٹیلنت۔۔۔
ہیثہ بی آنہی براثے مڑتہ،
یادوستی ایں مڑدمے ڈیوٹی چکا
ترکوخیں توپی ٹکرے آ
ورنائی جھنڑ سار پلثﺅ بڑتہ۔
بیثہ بی کہ آں دہ مئیں ڈولا ہیلیں
بے فائدہ ای آ
ہیل ایں حال حوالے آ
بلے نمبیں زمینا آں اولا بھانکر کثہ
ساڑتیں ڈوبر ا وثی آ۔۔
ماث، آنہیا ڈوھا مہ ذے
کہ آں پہ جنگا شتہ
نیں، مئیں خیالیں ماخثوں
غلط ، فرنانڈس حقہ سر ا یث
مئے اندر اچھڑو ہوانہیا آگہی بیثہ
زیندھ ئے تنہائیں حقیقت ئے
کہ پہ مڑدماشریں کہ بہ مری۔۔
شہ رستری زیندھے گواز ینغا۔
نغن گوئرما استہ ، یک درگڑی اے
پمادو ئیناں کھوڑث۔
پر پہ آں بچاکہ پیدابیث
ماث ، تہ شئے چلّاوہ کنت؟
اودوہمی ٹوکے دہِ استیں کہ
آنہی پوہ بیغ گرانیں
آں کہ رونت او یک دگر ا گوں کننت جنگا
چھڑونغن آنہی سببیں چہ ؟
مرشی کفن دفنے اث
پہ ہمانہاں کہ یک اڈھے آ بجثغ انت
مں دیثہ گوں وثی چماں
بلے لفظ نے کہ ترا بہ ڈساں
اے سوادھ مناں چکھر عجب مانا تکہ
اے چکھرحیراں کنوخے اث
کہ ہماں پورثغیں صذانی چکا
یک الوکا ئیں تجلائے بلغایث
مں آں دغامے آ دیثنت
تابوتانی تختہ آں ژہ
مں دیثہ کہ تابوتانی پلکہاں ژہ دست
درا لڑ کغئے ثنت اِش
آں وثی مرگ ئے تہا گوں یک دگر ا اوار بیثغہ ثنت
آں یک مڑدے بھیرا وپتی ئے ثنت
اومستاگیں موث ئے لمبو
آنہانی چماں تجلائی بلغئے ثنت۔۔
سذتی مں پوہ بیثغاں
آنہیا جنگہ پڑا روغی اث
فرنانڈس جنگ ئے تہا مڑتہ۔۔
مں آنہیا ہچبر دیثہ نہ خناں
ماث، فرنانڈس ختم بیثہ!
ماث ، فرنانڈس شثہ،
فرنانڈس مڑ تو پورے جیثہ
موتکاں کں، کہ آں ورنا ئی آ مڑتہ
پر، پیریں مڑد ا ہچ مہ گوئش!
کہ غم آنہیا تباھہ کنت۔
وثار ہندے آ لکیں ، سوکائی آ سڈک
او‘زوا مہ کش ، مہ کش۔۔۔
اغرآنہیاسماکفی
اغر آنہیا شک کفی
(تو)گشی ماہردوں ہیر میروں،
او یک چُکے امیدواری استیں۔
تو آنہیا گوئشتہ کنئے ، ڈولارز
نیں پری آنی قصہاں ہیل گرغیں
آنہہ و فرنانڈس چِھٹی آنی تہا پولا کنغاینت
تہ بچے پیدابیغا باڑ ائیے یا منڈے ئے۔
ترازیات نویسغ ، منی مکہیں ماث،
چھڑوئی زیات کنت مونجھاں
سلام تئی دوستی ایں جنک،
ڈولوریس ماریا گویا۔