’’ھال کن، چنچک کت باریں‘‘۔
’’ جستا مکن‘‘۔
’’چیا ، چی بوت زاناں؟‘‘۔
’’ سہ ءُ نیم ءَ چہ گیش نہ بوت اَنت‘‘۔
’’اڑے ۔۔۔تو سُستی کتگ گڑا۔۔۔۔۔۔‘‘
’’من ناں ۔۔۔۔۔‘‘
’’ھدا ءَ بچار منی سرا نہ لڈے ءِ، من ترا بندات ءَ جست کت تو گشت من وتی بندءُ بوج کتگ‘‘ ۔
’’ ھؤ راست گشءِ ،تئی میار نہ اِنت واجہ ‘‘۔
‘‘گڑا کئی میار اِنت؟ من سجھئیں کوٹی ءَ گَشت اوں، دُرستانی پچّ گِپت اَنت بلے تئی نیمگایک رَندے ھم چک نہ جَت ءُ نچارِت کہ ڈسٹرب مبے، تو من ءَ وت گشتگ اَت کہ من ءَ ھچءِ زَلورت نہ اِنت ، دُراھیں بند ءُ بوج بوتگ اَنت۔پمشکہ من چہ تو دلجم بوت ءُ دومی بُنجاہءِ چار ءُ دلگوش ءَ شتوں، نوں اتکوں تہ وھد ھلاس بوتگ‘‘۔
من نزانت چُش بیت واجہ۔ یک نمبر من وَ بندات ءَ کت، پدا سہ ءُ نیم ھم رَند ترءَ سرجم بوت اَنت ، بلے چدءُ پدپھک ھورکیں دست ءَ نشتگوں۔پرچہ کہ۔۔۔۔۔۔۔۔۔‘‘
’’تئی پِت ءَ گُشت کہ چارگ ءُ نبشتہ کنگءَ سک بلد اِنت‘‘ ۔
’’ہؤ بلے۔۔۔۔۔۔۔۔‘‘
’’سھبی تو وت گُشت کہ دو چَٹّکیں ھلپر شاھاز کتگ، سواری اَست ،زَّر ھم داتگ اَنت ءُ دوشی دو بوتل ھم وارینتگ اَنت ،گڑا انگتہ تو سہ ءُ نیم جستانی پسّہ نبشتہ کتگ؟‘‘۔
’’دو بوتل ناں واجہ، سہ داتگ اَنت، یکے دوشی پشت کپتگ اَت، من دات کہ شمے مرچیگیں بیگاہءِ توشگ اِنت ‘‘۔
’’ گڑااَنگہ تئی پنچیں جستانی پسہ اش نیاؤرت ءُ ترا ندات اَنت؟ اِنچو گور کنگ ءَ پد ھم اے ھال اِنت، اے گڑاسکّیں نمک ھرام اَنت‘‘۔
’’اَسلءَ اے شوماں شپءِ سبر نہ کتگ، سرجمیں بوتل ے گلاٹتگ، ھوش اِش بَرگَشتگ، جستءِ آرگ ءَ سستی کنگ ءَِ اَتنت ، من ھبر داتنت، پوٹو اسٹیٹ والا نیمگ ءَ اِشتاپ اِشتاپی روگ ءَ بوتگ اَنت، سینکل ے ءِ گوما ڈُکّ اِش وارتگ ٹّپی ءُ ٹوری اَنت نادراہ جاہ ءَ کپتگ اَنت نارگ ءَ اَنت، انّو من ءَ ھالءَ گپت ‘‘۔
’’اے ھسابا گڑا تئی ھلپراناں نوں وت ھلپرےءِ زَلورت اِنت‘‘۔
