اِشتہ ہنگلاجا بے تمائیں مَلَنگ
دیمپہ نانی ءَ چِرّ و لَڑ بَندَنت
اُشکتگ من کہ زیارتانی سرا
آ، مُراداں وَتی دِلئے گِندَنت
۔۔۔۔۔۔۔۔۔
شُتَنت ہنگلاجئے نیمگا ، کئے زانت
لوٹِتگ کئے ہما نگوئر آوانا
کئے اِنت تِیر جَن مں پردَگئے پُشتا
ٹپّی کئی مان ئنت مں دل و جانا
۔۔۔۔۔۔۔۔۔
نہ ہوا و ہَوَس، نہ حِرص و تَماہ
ڈُبّ ووَش ئنت وَتی چڑھا ، شپ و روچ
مِہری گوں ہنگلاجا اِکدّر اِنت
نَدری گردینَنت زندئے وشیّں روچ
۔۔۔۔۔۔۔۔۔
تو بلوٹَے اگاں ہِبئے جوگی
بُست بِرہ، مُرشِدئے بِکن دِیدار
پَٹ و دَرگیجی ہنگلاجئے گوئرا
نِشتہ بِیت اوداں ، ہَندے آ بوتار
۔۔۔۔۔۔۔۔۔
ہنگلاجئے سفر تئی دیما انت
راہئے سِنگ ئنت پہ تئی سفر اَوھام
لوگئے نِندگ دلِیل اِنت مَنڈی ئے
قاتِلیں جؤر پَرتؤ اِنت آرام
پُھل دَپے ہیل اِنت، پرتئی دیدار
کایَگا ئنت چہ شگھرِ با پیگَھام
۔۔۔۔۔۔۔۔۔
دیم پہ ہنگلاجئے زیارتا ، زُوتی
کِلّنت اِے مَہتگاں رؤنت جوگی
کَد پدا بِیت نصیب دِیدارِش
تؤ کُجا بئے، کُجا بی ئنت جوگی
۔۔۔۔۔۔۔۔۔
چَہ ندارگ بِبَند چَمّانا
جُست و جُو آگوں ، ہچ نہ بِیت حاصِل
آرِزُوگانی لَمبَگاں مں بُسُچ
رنگ وبُو آ گوں ، ہچ نہ بِیت حاصِل
پَٹّ و پولِش مں ہنگلاجا بِرؤ
آہ و ھُو آ گوں، ہچ نہ بیت حاصل
۔۔۔۔۔۔۔۔۔
پَدّھرا بوت شمے مَیَرزوئی
ہنگلاجئے شُمے سفر، بے کار
جَلوگا روچئے چے بِزاننت ، ہما
کپتگنت مں تہارِیاں، جَماّر
شُما اوداں نہ دیستہتی جوگی!
نِز درھنز ینت جلوہ نا کین یار
۔۔۔۔۔۔۔۔۔
