مادستاں کپتغوں
تہ او مناں
دست تکڑائی گپتغاں
ژہ منی دلا ہون رشی
او تو نزور بیثغئے، آنسر چے بیت؟
یکے دھسےّ جی،
یکے جنے جابی……..
او ھما یک توئے۔
ھُم ۔۔۔تراشک ایں ؟ ہژمبغانہ یئے؟
پر مں جلوّ ہ کنغ ئے ہر اٹکل ٹاہثہ
من مڑائی تہا ثی دل ماں کثہ
او تو جنغہ بئے……..
سڑثغیں
ماری زہرا پُریں زیندھ
اے نِیں نہ ایں کہ ماشروع کثہ، تہ ازنئے
مئے ڈوئیل تہ دیری بنا بیثہ۔
وثی ڈوئیل ما گوں جذبہ آ شروع کثہ
باز دراژیں
روشاں ژہ۔
بازروشاں ژہ
ماوثی پنجغ و بانسک
گپتغاں۔
من ہچبر شموشتہ نہ خناں
تئی رستریں چَنگلاں
کانڑ ئے تہا گیس تَرکّثہ
کوئلہ ئے ستّواں
پور ثہ
پانزدہ مڑد۔
اشیا پوثہ
پانزدہ انسانانی
لاش
شَماں مُڑدغاں
یکے
من اثاں
نیزگاریں میتگئے دروازغئے گور ا
کپتی ئیں
یک تو پکے کہ شہ دفا دو نہو اَنت روان،
او لاش سوکائی آ برف ٹہی۔
ہچ کوکارنے،
ہُلجانے
تُو پکی یک تیرے
گڑا۔ پہ ڈھیرا یک کچرہ اے۔
اے اِکھر ارزانیں کہ……..
ہچ مڑائی نے۔
پہ مڑائیا ہچ جذبہ نے،
او ہچ ہڑدُڑ نے۔
ترا سما نہ ایں
ہمے کئے اَت؟
ہمے
من اثاں۔
ہئورا ششتغیں پکوئیں
سڑک ء چکا
کُشتغیں کپتی اَیں
کہ لکثئو حملہ کثئیش
او
آں
کشے جابیثہ۔
آزمانابارودی سرنگ
ایر کنغ بیثغنت
او ہمے دھماکہ آ گوں ٹکرٹکر
بیث کفیث
چَونک ء چکا
پر، آں مڑدکہ
کپتی ئیں اوذا
ھوناں ڈوبارتی آ
منی برات ایں……..
یک آسے اث
قہر ئے مہر ئے
آنہی شیشہ ایں نغاہانی تہا۔
وِلّن،
مکروہ ایں
توپک والا
چمہ بُوٹ پٹا
شہ چماں اوڈھر بیثہ۔
ترا ہماں بدمعاش گیریں؟
ہواں
من
اثاں۔
پر ترا ہماں چُک گیریں
کہ مُڑتہ
پیرس ئے بیریکیڈانی چکا،
یک چکے
کہ مُڑتہ، مڑائی ئے تہا
ھوناں لڑاِثی ئے
پذ کنزاناں؟
گرمیں ہون آنہی رغانی
سوکا سوکائی
آسنہ ڈولا ساڑت بیاناں شتہ،
او گڑا آنہی جوڑ جُذا بیثغ انت
نہ پاذاریں برشکند ئے تہا ۔
پر، تو نڑیں کہ آنہی جوڑ نیل ترّثغ انت
آنہی چم
دانڑتی گوں شانااث انت ٹمکغا
مڑدما گوئشتیں کہ آنہی چم شعراں جنغا ات انت
* "liberte cherie”
آں زھگ کہ
ہموذا کپتی اَے
تو پک جثی آ ……..
موت ئے ساڑتیں چنگلانی لافا۔
تراسمائیں
ہماں کئے اث
آں
من اثاں!
ترا گیریں
یک انجنے
گوں دل شاذیں امیداں
دِنّاناں
مژاں
اوذ کہ بالی مرگ دِہ
ایر کفغ ئے
جرات ء نہ خن انت
ژہ نیاما مژاروئیں گواث ئے؟
یک انجنے گوں پرّاں
ساڑتیں پڑدہاں
دِنّاناں
او زمین ئے گردش ئے دگّاں
تبدیل کناناں،
گوں گیسولین ئے قطرہاں دھماکہ آں کناناں
پراگریس ء پلوا دگا چیٹاناں۔
ہوا ں انجن
کہ باز بڑزا شئیراں جنغیں
منی دستانی پوریاتیں،
او انجن ئے شیئر
ہون انت منی دل ئے۔
آ مڑدکہ سریہالیں
چم اش ٹک اث انت
لڑزوخیں قطب نما ئے چکاّ،
آ مڑدکہ
جرات کثئی مقابلہ ئے
گوں ساڑتیں قطب ئے فراسٹ و پالواں……..
تراسمائیں
آں کے اث؟
آ ں
من
اثاں۔
من ایذ ا یاں
من او اذایاں
من ہر جاہایاں۔۔۔۔
یک مزدور ے ماں ٹکساس آ
الجیریا ئے بندرگاہئے مزدورے
یا شاعرے……..
ہر ہندے آ یاں مں!
تئی چناں ،او زند،
تہ کَٹ ئے ؟
تہ او بد کار او زہروڑی ایں
لیغاروئیں چیز!
من
آسی دکاں
تہ آسی دُک ئے
او ماہڑ دوئینوں
ہیذاں ڈوبارتی آ۔
پر تئی ناغ درکفغ ئیں۔
تہ روغئے نزوربیاناں،
جہل کفاناں،
پمیشکا تہ غضب آں گوں
نیشاں منی جانا ٹمبغائیے،
سر ہ چکا او شتاثغیں مَرگ ئے ہژ مب ئے تہا ئے
شاید……..
پچے کہ رندا
تئی ھندا،
گوں پوریات و ہیذاں
ما اڈکنوں
یکجاہ و اواری آ
یک زندے
کہ مئے دل ئے واہگ بی،
یک زندے
کہ مارگزر بی،
او
چکھر عمدہ بی
ہماں زند!
* فرنچ لفظ اے مطلبیں ”دوستی ایں آزادی“ ۔