پُرمڑاہیں دیوان
واجہ عبداللہ جان جمالدینی ئے بابتا گپ جنگا منی گونگیں مردمے وتی سرجیں عمرا ببابہ دنت ہم گرانیں سودائے نہ بیت۔پہ بلوچ ، بلوچی ، بلوچستانا واجہ ئے کرد ئے کلیں تک وپہناتانی سرا ٹوک کنگ قولِ فاضل ئیگا کہ ’’چہ گران باریں گراباں سنگیں ترنت‘‘۔ واجہ جمالدینی پہ بلوچ بلوچی و بلوچستاناربئے داتگیں گراں بہائیں دادے ۔ آنہی زندو کردئے سرجمیں تک وپہناتانی گیشواریا من وتی زانتا کسان وکوتاہ سرپدباں ۔ من کہ مروچی اے پُرشان وپُر مڑاہیں دیوانا شمے دیما ساڑی آں منا ایوکا پہ بلوچی زبان و لبزانکئے دیمرویا واجہ عبداللہ جان جمالدینی ئے کردے بابت چندے تر اُن کنگی انت ۔
شرپداریں دیوان
واجہ عبداللہ جان جمالدینی بلوچی زبان ولبزانکئے مزن نامیں شہ زانتاں شماربیت۔ واجہ بلوچیا چہ ابید انگریزی ، روسی فارسی ، اردو ، براہوئی ، پشتو آ بازیں دگہ ہندی وڈنی زبان و لبزانکاں چہ شناسائیں مردمے بوتگ۔اگں پہ بلوچی زبان ولبزانکا واجہ ئے کرد چارگ بہ بیت،داں آنہ ایو کا بلوچی نوکیں لبزانکئے بنگیجکا رانی تہا ہوارنت بلکیں بلوچی زبانئے دیمروی ، آنہی تہا پولکاری ئے سنچ ئے ودی کنگ او بلوچی زبانا نوکیں دور و بار یگ ئے لوٹ و پکاراں گوں ہمگرنچ کنگا واجہ ئے جہد بے درورانت۔
واجہ عبداللہ جان جمالدینی مردم ساز و ادارہ سازیں انسانے ات ۔ بلوچی زبان و لبزانک ئے بازیں مزنیں نام واجہ ئے دست کش انت۔ ہمے بازیں نامانی تہا یکے واجہ صبا دشتیاری انت کہ آنہیابلوچی زبان و لبزانک نیمگا آرگ ئے مستریں دست واجہ عبداللہ جان جمالدینی ئیگ انت۔ واجہ جمالدینی وتی مردم سازی ہمرائی ادارہ سازے ہم بوتگ ۔ واجہا اے گپ شری آ مرتگ وزانتگ کہ اگں بلوچی زبان و لبزانکا نوکیں باریگ ئے ایند گہ زبان ولبزانکانی سرپا آرگ و سرکنگی انت داں آنہیاچہ ذاتی جہدو کوششاں زیات پہ آنہیا ادارہ وگلانی جوڑ کنگ زیات پکار انت ۔ انچیں گل و ادارہ کہ آہانی تہا سائنسی رنگ رسرچ و پولکاری ئے ہمرائی بلوچی زبان، لبزانک یا آنہی ربیدگ ئے گار وبیگواہیں مڈی پد جنگ بہ بنت او چنگ و نزآرگ بہ بنت ۔ پمیشکہ آنہی بلوچی نوکیں لبزانک ئے بنداتی وہد 1951آبلوچی ئے اولی لبزانکی گل ’’بلوچی زبان وادبئے دیوان‘‘ جوڑ کنگا وتی بے دروریں جہد کرت انت۔ او ہمے گلئے اولی سیکریٹری جنرل ہم جوڑ بوت۔اے گلئے مستریں مول ومراد بلوچی زبا نئے دیمروی ، آنہی اڑو جنجالانی گیشواری ، بلوچی لبزانکئے دیمروی او پٹ وپول بوتگ ۔ ہمے گلا واجہ جمالدینی آبلوچی سرزبانی لبزانکئے باز گاروبیگواہیں چیز،چوشکہ بازیں کلا سیکل شعر چت و نزآورت او ایشاناں چہ گار وبیگواہیا رکینت۔
چہ اے گلا ابید بلوچستانئے راجد پترئے نامئیں ، راجمانی لبزانکی اوچاگردی گل ’’لٹ خانہ‘‘ ہم واجہ جمالدینی جہدانی بروردرنت، کہ چہ ادا بلوچستانئے راجمان ، چاگرد و زبان و لبزانکا نوکیں رنگ و گوناپ بخشا ہگ بوتگ۔
اے کلیں بے مٹیں کا رکر تاں چہ ابید ہما کار کہ منا کلاں چہ گیش واجہ جمالدینی ئے Wisdom و آنہی دیر چاری ئے پلوا بارت ، آواجہ جمالدینی ئے بلوچی زبان وانگجاہ ، زانتجاہ شہ زانتجا ہانی تہا وانگ و وانینگئے میئل و رجحانا دیما برگ انت۔ پدا اے کلیں جہد انی تہا آنہی مستریں سوب مندی یونیورسٹی آف بلوچستانابلوچی ڈپارٹمنٹئے بوجگ وپچ کنگ انت ۔ آنہی کار اماں بلوچی زبانا ہائیر ایجو کیشن ئے میئل ئے ودی بوہگ ئے ہمرا ہیا بلوچی زبانا سائٹیفک و اکیڈمک پولکاری ئے دیمروتی دئیگا مزنیں کردے ادا کر تگ ۔
یونیورسٹی آ ف بلوچستانئے ہمے بلوچی ڈیپارٹمنٹا مرچی ملکئے ایندگہ وانگ و زانگی ادار ہانی تہا وتی شاہ و لمب دراج کشانا برتگ انت، چوشکہ بلوچی ڈیپارٹمنٹ یونیورسٹی آف کیچ ، علامہ اقبال اوپن یونیورسٹی ئے بلوچی سرٹیفیکٹ کورس ،نمل یونیورسٹی ئے بلوچی ڈیپارٹمنٹ، کراچی یونیورسٹی ئے بلوچی سرٹیفکیٹ کورس یاد یما آوکیں وہداں گوادر یونیورسٹی ئے بلوچی ڈپارٹمنٹ بہ بیت اے کُلانی سرچمگ و بنزہ بلوچستان یونیورسٹی ئے بلوچی ڈیپارٹمنٹ انت۔ پداوشی ئے ہبرایش انت کہ ایشانی تہا چیزئے بلوچی ڈپارٹمنٹ نوں وتی سیمسران ودان کنانا ڈپارٹمنٹے آ چہ انسٹی ٹیوٹئے نیمگا دیمروئی کنان انت۔ اے درگتا یونیورسٹی آف کیچ ئے انسٹی ٹیوٹ فار بلوچی لینگویچ اینڈ کلچر، اویونیورسٹی آف بلوچستانئے انسٹی ٹیوٹ آف بلوچیالوجی ئے کار دیما جنزان انت۔ انشااللہ زوتاں اے پہ بلوچی زبان و لبزانک ئے ہزمتاوتی کار اں شاہیگانیں رنگے دیما کار نت بزاں واجہ عبداللہ جان جمالدینی ئے گیشتگیں درجک ئے روتگ نوں دُور درا سر کشان انت ، او آنہی ساہگ نوں گیش ودان انت او وتی وتی برو بُور گیش کنان انت۔
بلوچی زبانئے دیمروی او آنہی اڑ وجنجالانی گیشواریا واجہ جمالدینی ئے دگہ مستریں جوانی ایشیں کہ لسانی جیڑ ہانی گیشواریا آنہی
اپروچ سک باز سائنٹفک بوتگ ، تُری بلوچی زبانئے بنشتہ راہبندو سیاہگ ئے جیڑہ بہ بیت ، ماں بلوچی زبانا درامدیں آب و نوکیں گا لبندانی کا رمرزی ئے جیڑہ بہ بیت یا بلوچی زبانئے Standandization ئے جیڑہ و جنجال بہ بیت، اے کلیں جیڑہانی گیشواریا واجہ جمالدینی ئے لیکہ مُدام لسانی سائینسا گوں ہمد پیں لیکہے بوتگ ۔ چوشکہ پہ درامدیں گالانی بابتا آوتی یک نبشتا نکے تہا چوش نبشتہ کنت:
’’زبان ہم گوں راجی دیمرہیا شون گرانا روت، انچوش کہ انسانی گُزر ہر نوکیں درکیجگ وٹا ہینگ ئے سوبا انت۔ زبان ہم وتی گُزرانی پیلو کنگا نوکیں پکر و حیال ولبزاں چہ کش وگورئے دیما شتگیں راجانی پکرو حیالاں وزباناں براہ کنت۔ انسان راجی زندئے ہرتک وپھنادئے دیمرہی وشاہیگانی ایوکا ایک راجے میرات انت او نہ آراج اے دعوی کت کنت کہ آنہی وتی راجی دیمر ہیا شہ وتی جندئے وسیلہاں شون داتہ۔انسانی تاریخ انچوشیں رودے کہ آشہ ہر نیمگا چیل وچاچک وشیلگان پیم بیت او روت ویک بے گوازیں وبے تیابیں زرے صورتا تالان بیت کہ آاے گلزمین ئے درستیں اوباد گانی میراث انت۔ انچوش کہ اِچ راج اے دعوی کت نہ کنت کہ یک پت وماتئے یک حونے ئے نسل ئے انسانا نی جم آوری ایت ۔ ہمے ڈولا ہچ زبان وربیدگ اے دعوی کت نہ کنت کہ آتہنا وتی چاگردئے مردمانی نندونیا دوو سیلہانی آسرنت اوآنہیا چہ کش وگور ئے راجانی زباناں اثر نہ زرتہ( رفیق ، سنگت ، اوپار، تاکدیم377)‘‘۔ در آمدیں گالانی بابتا واجہ جمالدینی ئے اے لیکہ مروچی ایں دورئے کلیں زبان زانت و شہ زانتانی تپاکیں لیکہے ایت۔ کل اے گپ ئے سراتپاک انت کہ دنیائے اچ زبان وتی اندرا چہ پہک و زگر نہ انت او دنیائے ہرزبان چہ وتی ہمساہگ وہم کنگل یا وتا چہ زوراکیں زباناں چہ اثر زورنت او باز جاہا وتی اثرا ہم دئینت۔
ہمے رنگا بلوچی ز بانئےStandardized نہ بوہگ ئے سرا واجہ وتی یک نبشتانکے تہا چوش نبیسیت کہ ’’منی نزا بلوچی نبیسگ و لبزانک ئے مستریں اڑ زبانئے Standardized نہ بوہگ انت۔بزاں بلوچیا یکراز ا نبشتگ کنگ نہ بیت لیکوڑچون یک پیما رواج دیگ بہ بیت تاکہ وانوکا جنجال مہ کنت۔ حالانکہ راجی ہر عمل ئے تو کا پروسیس ئے دورانا دیمرہی کنت وبلوچیا آنہی نوکیں لبزانکا تحریرئے صورتا ودی بوگئے وتی گوستگیں کم وگیش سی سالئے مدتا اے نیمگا دیمر ہی کرتہ ، بلے بلوچی نبشتگ کنگئے بھیر یکے نہ انت۔ واجہ جمالدینی ئے مروچیا سی و چل سال پیش گشتگیں گپ مروچی ہم ہماوڑ گیشوارنہ انت، بلوچاں وتی زبانئے سنٹڈرڈ ائز یشنئے ھاترا سائینسی رہبندانی سرا کار نہ کرتگ او ہم تپاکی وہم پتی آیک سٹنڈرڈ زبانے دیما نیا آور تگ۔
واجہ جمالدینی ئے بلو چی زبانئے دیمروتی ئے تکا دگہ مزنیں کارے آنہی بلوچی زبان و ڈنی دنیا ئے شہ زانت و زبان زانتانی میانا پہل ئے کرد پیلو کرتگ۔ آنہیا مدامی رابطہ و سنگتی گوں ہما کلیں زبان زانت وشہ زانتاں بوتگ کہ آہاں پہ بلوچی زبانا پولکاری کتگ یا پہ پولکاریا وتی واہگ درشان کرتگ۔ چوش کہ واجہ اسٹر سر، واجہ جورف ا لفنبا ئین ، مشکلوپ، بانک کارینا، اگنس کورن او ایندگہ بازیں زبان زانت او شہ زانتاں گوں واجہ ئے رابطہ ہروہدا بر جاہ بوتگ۔ و اگں کسے چہ ڈنا بلوچی زبانئے سراپٹ وپولا بلوچستانا اتکگ انت گڑا آہانی مستریں دست گروک عبداللہ جان جمالدینی بوتگ۔ اے بابتا واجہ جورف الضنبائین وتی یک بنشتانکے تہا گشیت:
On my first visit to Pakistan in autumn of 1961,I found my self in Quetta and soon I made the acquaintance of Abdullah jan Jamaldini and through him many of those Baloch interested in the Balochi Languange and its literature.
اے رابطہ وسیا دیاں چہ ابید واجہ عبداللہ جمالدینی ڈنی ملکانی مزنیں یونیورسٹی ، وانگ وزانگئے ادارہانی تہا بازیں سمینار و کانفرنسانی براہ و زینت بوتگ او اودا ماں بلوچی زبانئے مستریں سفیر بوتگ ۔ اے شرپ وشان آنہی مرگا چہ پد ہم برجاہ بیت۔ گمانا واجہ عبداللہ جان جمالدینی اولی بلوچ شہ زانت انت کہ یورپی ملک سویڈنئے اوپسالا وڑیں تاریخی یونیورسٹی ئے تہا آنہی مرگا پہ پُرسی ریفرنس دارگ بوتگ کہ اے پہ بلوچی زبانا آنہی کرتگیں جہدانی مستریں مانزان انت۔
شرمندیں دیوان۔
بلوچی زبان ولبزانکئے دیمروئیا واجہ عبداللہ جان جمالدینی ئے کرد ئے سرا ہمینچو زیات تران بکن ات تُنگی ہمینچو گیش ودیت۔ واجہ عبداللہ جان جمالدینی بلوچ، بلوچی ، بلوچستانئے پہروشان انت۔ بلوچ واجہ عبداللہ جان جمالدینی سرا ہمینچو پہر وشان کت کنت بکنت۔ پر چیکہ واجہ جمالدینی گونگیں مردمانی ودیگی آ یک راجے آکرنانی کرن درکار بیت ۔