27فروری او27اگست 1917ئے نیامی شش ماہ ئے نتیجہ ، معروضی صورتا چو ش خلاصہ کثہ کیث:
ریفارم الماریاں بند کنغ بیثغ انت، سرکاری نوکری آنی بہر وبانگ پیلہ کنغ بیثہ او بہر وبانگہ اندرا ‘‘غلطی’’ دوہمی دھکاں بہرو بانگاں گوں درست کنغ بیثغنت۔
پر،جذا جذائیں بورژوا او پیٹی بورژوا پارٹیانی اندرا (چوکہ روسہ اندرا کیڈٹ ، سوشلسٹ انقلابی او منشویکانی اندرا ) بیوروکریٹک مشینری ئے ‘‘ نوخیں دھکاں بہرو بانگ ’’ہما نکر کہ زیادہ بی ہمانکر زیات مظلومیں طبقہ او آنہانی سربراہ پرولتاریہ ئے سجہ ایں بورژوا سماجا گوں اٹل ایں صُلُح نہ وی ایوخیں مخالفتہ باروا واقف بیاناں روث ۔ شمیذاں کُل بورژوا پارٹیاں پہ ، حتی کہ شمانہاں سک جمہوری او ‘‘ انقلابی جمہوری’’ پارٹیاں پہ دِہ اے ضرورت پیدابی کہ آں انقلابی پرولتاریہ ئے خلافا وثی ظالمیں کاراں سک کننت ، ظلم و جبر ءَ والی مشینری ، ریاستی مشینری آ زیات تکڑا کننت ۔ واقعہ آنی ہمے سلسلہ انقلابہ مجبور کنت کہ آں ریاستی اقتدار ہ خلافا‘‘ تباہی ئے وثی کل طاقتاں یک ہند کنت ’’ او وثی دیما اے مقصد ا ایر کنت کہ آں ریاستی مشینری ءَ بہتر نہ ٹاہینی بلکہ اشیا بھورینی او تباھہ کنت۔
اے منطقی بحثے نہ یث بلکہ واقعہ آنی حقیقی رذوم اث، 1851۔1848ئے حقیقی تجربہ اث کہ معاملہ ہمنگا پیش کنغہ پلوا بڑ تئی۔ مارکس تاں حد ا داں سختی آ گوں تاریخی تجربہ ئے زوراخیں بنیاد ءَ چکا جکثہ ہمے اے حقیقتا ژہ دیثہ کیث کہ 1852ءَ اندرا آنہیا دانڑتی اشی باروا تکڑائیں سوال کڑونہ کثغث کہ تباہ کثغیں ریاستی مشینری ہند ا تاں چیز گیڑت ۔ تجربہ آ ہمے معاملہ ئے گی ایشغ آ پہ دھماں وختا مواد نہ ذاثغہ ، آں کہ پذا تاریخا 1871ءَ لافا ایجنڈہ آ ایر کثہ ۔ 1852آ حقیقی سائنسی مشاہدہ آ بالکل درستی آگوں چڑو اے ثابت کثہ کث ،کہ پرولتاری انقلاب ریاستی اقتدار ہ خلافا ‘‘ تباہی ئے سجہ ایں طاقتانی یکجا کنغ ’’ ، ‘‘ریاستی مشینری ئے ’’ ٹکر ٹکر کنغ ئے فرضہ نزیخا پجثہ۔
ایذ ااے سوال پیدا بیثہ بی، کہ آیامارکس ءَ تجربہ، مشاہدہ اور نتیجہ آنی جنرلائز کنغ ٹھیک ایں ، آنہانی ہمنگیں میدانے چکا اطلاق کنغ ٹھیک ایں آں کہ فرانس ئے سہ سال ۔(1851۔1848) ءَ تاریخاژہ مزں پاند یں ؟ ۔ ہمے سوالہ چکا بحثہ کنغا ژہ پیشا ما اینگلز ئے یک تبصرہ اے گیر اروں او گڑہ حقیقتانی جاچہ کنوں۔ ‘‘18دمی برومیئر ’’ ئے سیمی ایڈیشن ئے وثی پیش گالہ اندرا اینگلز ا لکھثہ :
‘‘ ۔۔۔ فرانس ہماں ملک ایں کہ او ذا ، دنیا ئے دوہمی مکاں ژہ زیات ، ہرد ھکے تاریخی طبقاتی جنگ یک فیصلہ اے آداں پجثغنت ۔ کہ او ذا ہماں بدل بیوخیں سیاسی دروشم ، کہ ہمانہانی اندرا ہمے طبقاتی اڑاند حرکتہ کن انت اوہمانہانی اندرا کہ آں وثی انجاما داں پجنت ، بازاوشیشی آ ظاہر بیثغنت ۔ مڈل ایجز ئے فیوڈل ازمہ مرکز ، رے نسان ئے زما نغاژہ ، سماجی جاگیرانی بنیادہ چکا یک متحد کثغیں بادشاہت، بزاں فرانسا ‘‘مزن شانیں انقلابہ’’ اندرا فیوڈل ازم درٹینتہ او بورژوازی ئے حاکمی ہمنگیں سُچائی اے آ گوں اڈ ہینتہ کہ آنہی نظیر دوہمی ہچ ملکے آ نہ لبھی۔ او حاکمیں بورژوازی خلافا سغر کڑو کنوخیں پرولتاریہ ئے جہد اہمنگیں شدت اے زڑتہ کہ دوہمی ہچ ملکہ اندرا نیستیں’’ (تاک 4، 1907ئے ایڈیشن)
آخری تبصرہ کہن ترثہ پچیکہ 1871آ ژہ فرانسیسی پرولتاریہ ئے انقلابی سٹرگلہ اندرا یک خاموشی اے بیثہ ، تونڑیں اے خاموشی ہرچی کہ دراژبی ، آں اے امکانہ دَر نہ خنت کہ آؤخیں پرولتاری انقلابہ اندرا فرانس اے ڈسی کہ طبقاتی جدوجہد ئے آخر ا داں پجینغہ اندرا ،آں کلاسیکل ملک ایں۔ البتہ ، بیائیں ،ما نوزدمی صدی ئے آخر او گیستمی صدی ئے اول سرا ترقی کثغیں ملکانی تاریخہ چکا یک نغاہے جنوں ۔ ماگندوں کہ یک پلوے اصُل ہمے پراسس باز سُستیں رفتار ا گوں، زیات جذا جذائیں صورتانی اندرا ، او زیات مزائیں میدانہ لافا چلاناں شتہ ،یک پلوے ‘‘پارلیمانی اقتدار’’ ئے ترقی رپبلکن ملک ( فرانس، امریکہ، سوئٹز رلینڈ اندرا) او بادشاہی ملک (برطانیہ ، یک حدے آ داں جرمنی اندرا، اٹلی او سکنڈنیویائی ملکاں مں ) دوئینانی اندرا کنغ بیغایث، دوہمی پلوا مختلف ایں بورژوا او پیٹی بورژوا پارٹیانی اندرا کہ ملازمتانی ‘‘آوار’’،‘‘ آوار ’’ ئے بہرو بانگ ،او اغدہ دوہمی دھکا بہرو بانگ کث اش ، اقتدار ئے جہد ، بورژوا سماج ئے بنیادانی اندرا تبدیلی آ بغیر چلّاناں شتہ او آخر ا ’’ ایگزیکیٹو اقتدار’’ ، او اشی بیوروکریٹک او ملٹری مشینری ئے پیلائشت او مضبوطی کنغ بیغایث۔
اشی اندرا ہچ شک نے کہ ہمے صورت عام حسابا دراہیں کپٹلسٹ ریاستانی ماڈرن ایں رذومہ اندرا مشترک انت۔ 1848-51ئے سہ سالانی اندرا فرانسا تیز ، سختیں ،او مرکوزیں صورتا رذوم ئے اصل ہماں پراسیس درشاں آں کہ دراہیں کپٹلسٹ دنیا ئے خاصیت انت ۔
سامراج آ ( کہ بینک کپٹل ئے دور ، باز مزائیں کپٹلسٹ مناپولی آنی دور ، مناپولی کپٹلزما ژہ دیما گوئستؤ ریاستی مناپولی کپٹلزمہ ٹہغ ئے دور ایں ) صافی آ ڈسثہ کہ منارکی او کلاں ژہ آزادیں رپبلکن ملک ہر دوئینانی اندرا پرولتاریہ خلافا جبرو تشدد ئے زیات سخت کنغا گوں اشی بیوروکریٹک او ملٹری مشینہ اندرا بے مثالیں ودھک ظاہر بیثہ۔
عالمی تاریخ اے وختا بلاشک کہ 1852 ئے نسبتا بے مثالیں حسابے آداں ریاستی مشینری ئے ‘‘تباہی ’’ چکا پرولتاری انقلاب ئے ‘‘سجہ ایں طاقتاں یک جا’’کنغ ئے تیاری آ کنغئیں۔
پرولتاریہ اشی ہند ا چے کاری، اشی باروا پیرس کمیونا باز سبق دیوخیں مواد داثہ۔
3۔ مارکسا 1852 آ ہمے معاملہ شوں پیش داشتہ
1907آ مہرنگ آ نیوے زی تنگ نامیں میگزینہ (جلد2، xxv، تاک 164) اندرا وی دی میر ءَ ناما مارکسہ چٹھی ئے ٹُکر چھا پثغ انت ۔ دوہمی ٹوکاں ابید ہمے چٹھی اندرا اے جہلی نادریں ٹوک استنت :
‘‘او نِیں دھموذ کہ مئیں ٹوکیں ، ماڈرن ایں سماجہ اندرا طبقہ آنی وجود یا آنہانی نیاما سٹرگل ئے دریافت کنغا مئیں ہچ کریڈٹ نے ۔ اژ مں باز پیشا بورژوا تاریخ زانتاں طبقہ آنی ہمے جُہد ئے تاریخی رذوم بیان کثغ اث او بورژوا اکانومسٹاں طبقہ آنی معاشی سٹرکچر ئے تفصیل داثغ اثنت۔ ہماں نوخیں ٹوک کہ مں کثہ آں اے ثابت کنغ اث کہ :
1۔ طبقہ آنی وجود چھڑو پیدا وار ہ رذوم ئے خاصیں تاریخی زمانہاں گوں بستی ایں ۔۔۔
2۔ طبقاتی جُہد لازماً پرولتاری ڈکٹیٹر شپہ پلو ا باڑت۔
3۔ اے ڈکٹیٹر شپ وث سجہ ایں طبقہ آنی ختم کنغ او یک بے طبقہ ایں سماجے آ داں عبور ءَ والائے بیث ۔۔۔’’)(12)
ہمے ٹوکانی اندرا مارکس باز صفائی آ گوں اے گشغا مں کامیاب بیثہ کہ یکے تہ، اے کہ آنہی جندہ نظریہ او بورژوازی ئے سرکڑدہ او باز مزائیں مفکرانی نظریہ آنی اندرا چے خاص او بنیادی فرق ایں۔ او دوہمی ، ریاستہ باروا آنہی نظریہ ئے روح ۔
اکثر اے گشغ و لکھغ بی کہ مارکسہ نظریہ ئے خاصیں ٹوک طبقاتی جُہد ایں۔ پر، اے ٹوک غلط ایں۔ او ہمے غلطی ئے نتیجہ اکثر اے درکفی کہ مارکسزم ئے اپرچونسٹیں مسخ کنغ بیث او بورژوازی آ پہ قابلِ قبول ایں جذبہ ءَ اندرا اشی دروشم بدل کنغ ءَ بنت ۔ چے آ کہ کلاس سٹرگل ئے نظریہ مارکسا تخلیق نہ کثہ بلکنا مارکسا ژہ پیشا بورژوازی آ کثہ ۔ او ، اغر عامیں صورتا گشغ بہ بی تہ اے بورژوازی آ پہ قابلِ قبول ایں۔ ہماں مخلوک کہ چھڑو طبقاتی جہد ءَ من انت تو آں تننگا مارکسسٹ نہ ینت ۔ بیثہ بی کہ آں دانڑتی بورژوا خیال او بورژا سیاست ئے دنگ وحدّاں ژہ درنہ کپتغنت ۔ مارکسزم ئے چھڑو طبقاتی جہدہ اندرا بند کنغہ مطلب مارکسزم ئے گڈغ و بُرّغ ایں ، اشی صورت ئے پٹیں نغ ایں، او اے اے حد ا داں گھٹ آرغیں کہ آں بورژوازی آ پہ قابلِ قبول ٹہی۔ مارکسسٹ چھڑو ہمانہیں کہ کلاس سٹرگل ئے ٹؤکا منغا مزں پاند کنت داں پرولتار یہ ئے ڈکٹیٹر شپ ئے ٹؤکا باڑت ۔ اصُل ہمے ٹوکیں کہ مارکسسٹ او عامیں پیٹی ( او مزائیں دِہ) بورژوازی نیاما باز ڈونگھائیں فرقہ داث۔ اے ہماں گز او کسوٹی ایں کہ آنہی چکا مارکسزم ئے حقیقی پوہ بیغ او اعتراف ئے پرکھ ٹیسٹ کنغ بہ بی۔ او حیرانی ئے ہچ ٹوک نے کہ وختیکہ یورپ ئے تاریخامزدور طبقہ ہمے سوالا گوں یک عملی معاملہ اے ڈولا دیمودیم کثہ ،تہ نہ چھڑو سجوئیں اپرچونسٹ او ریفارمسٹ ، بلکنا سجوئیں کاؤتسکی والا دِہ ( ریفارمزم او مارکسزمہ نیاما شش و پنجہ کپتغیں مخلوق ) تَرس دیوخیں فِلسٹین او بورژوا ڈیموکریٹ ثابت بیثغ انت کہ پرولتاری ڈکٹیٹر شپہ نہ من انت ۔ کاؤتسکی ئے پمفلٹ ‘‘پرولتاریہ ئے ڈکٹیٹر شپ’’ کہ اگست 1918آ چھاپ بیثہ، بزاں مئے اے کتاب ئے سری ایڈیشنا ژہ باز پذ ا، مارکسزم ئے پیٹی بورژوا مسخ کنغ او عملی صورتا اشیا ژہ ذلیل ایں دستبرداری ئے پکوایں مثالیں ، وختیکہ ٹھگی آگوں دف زوانی اے تسلیم کنغ بیغایث ( گندیں مئیں پمفلٹ ‘‘ پرولتاری انقلاب او غداریں کاؤتسکی ’’ 1918) ۔
نِیں ایں اپر چونزم وثی خاصیں ترجمان ،سابق مارکسسٹ کارل کاؤتسکی صورتا ہماں کردار نگاری اندر ا پیلہ ای آ فٹ کئیث آں کہ مارکسا بڑزا داثغیں حوالہ اندرا بورژوا پوزیشن ئے کثہ، اے خاطر ا کہ ہمے اپر چونزم طبقاتی جہدئے تسلیم کنغ بورژوا سیادیانی اندرا داری ۔( او ہمے دائرہ اندرا ، ہمشی چوخاٹہ اندرا، یک تعلیم یافتہ ایں لبرل اے دِہ ‘‘ اصولی ڈولا ’’ طبقاتی جہدہ تسلیم کنغہ ژہ انکار ہ نہ خنت!)۔ اپر چونزم طبقاتی جہدئے اعترافہ بنیادی ٹوک بزاں کپٹلزما ژہ کمیونزما داں عبور ئے زمانہ آداں ، بورژوازی ئے تختہ چپی کنغاداں او آنہی پیلوی آ ختم کنغ ئے زمانہ آداں مزں کنت نہ باڑت ۔ اصلامں ہمے زمانہ لازمی صورتا باز تشدد والائیں طبقاتی جہد او آنہی بے مثالیں دروشمانی زمانہ ایں ۔ او نتیجہ آ ،ہمے زمانہ ءَ اندرا ریاستا لازمی صورتا ہمنگیں ریاست اے بیغی ایں کہ آں یک نوخیں طرز ے آ گوں جمہوری بی ( پرولتاریہ واسطا، او عمومی صورتابے جائیدادانی واسطا او نوخیں طرزے آ گوں ڈکٹیٹری (بورژوازی خلافا ) ریاستے بی۔
دیما ۔مارکس ئے ریاستہ نظریہ ئے اصل روحہ چکا چھڑو ہماہاں مہارت گپتہ آں کہ پیلوی آ پوہ بنت کہ یک سنگل ایں طبقہ ئے ڈکٹیٹر شپ ضروری ایں نہ چڑوعمومی ڈولا ہر طبقاتی سماجاپہ ، نہ چڑو پرولتاریہ آپہ کہ بورژوازی ئے تخت چپی کثئی ، بلکنا ہماں سجہ ایں تاریخی زمانہ آپہ دہ ضروری ایں آں کہ کپٹلزم ءَ ‘‘ غیر طبقاتی سماج’’ یعنی کمیونزما ژہ جذاکنت ۔ بورژوا ریاست صورت و ‘‘فارم ’’ اصل باز جذا جذاانت پر آنہانی اصل روح یک ایں: ہمے کُل ریاست، آنہانی ‘‘فارم ’’ تونڑیں ہر ڈولین اے کہ بی ، آخری تجزیہ اندرا ضرور بورژوا ڈکٹیٹر شپ انت ۔ کپٹلزما ژہ کمیونزما داں پجغ بلاشک ، حد ا زیات پر یوانی آ گوں ، لون لونیں سیاسی ‘‘فارماں’’ مورینی ، پر اصل روح حتمی ڈولاہماں یک بی: پرولتاریہ ئے ڈکٹیٹر شپ۔