ہشت ہزار میٹر بڑزا
آزمان ئے نیلغیں کمب
منفی چل و پنچ،
ڈکال آکسیجن ئے
پَر ، پریشتغا نی شُشنت۔
دریچہ آں درا
سینگھار تغیں سمارتغیں سلھاڑ تغیں کائنات
پہ منی چاکری آتئی نوکری آ
دست بستغی آ
حاضر جناب۔
انگل کنوخیں ، ہژمبینوخیں ، گواروخیں، نپت جنوخیں جُڑ پاذانی شیرا
اندرا
حفاظتی بیلٹ ، گراں مہزبی گراں تواری
مزں لافیں دڑوگائیں پلاسٹکیں سیٹھ ، افسر۔
ماہ گلیں ابریشمیں ترھانڑیں منڈانی
شکلی وہشیں منڑا
”چائے ، کافی؟“
برشکندیں کاغذیں رک ہر پلوے
جلشکوخیں دتان و زواذ بوئیں ملگور
دل جَسکیں لوڈ
ساہ کشیں ڈوبر
ہمے سوزاں پری ڈیھ آ
دِہ
پولاں مں وثی یارا۔
ہماں
چفکیں اِڑِکّیں دادھری آ