دانی گیرَئے دِلا
مُدتے آ شہ من تو جُدا بیثغوں
مئیں و تئی مہرئے وشبو گواثاں بُڑتَنت
قول وعدہ قسم کُل آں زنگاں جثنت
ٹُل شونقانی پرُشتو بُنا کپتغنت
ناگُماں بے گُمانی نذر بیثغاں
دانکُرے آ دِہ تئی مہرو بشکند سری
مں شمُشتغ نیئنت
دانی گیرنت دِلا
وھد من تئی سرا رنج بیثہ نوی
رنج بیثہ نوی آزماں مئے سرا
ھچی گوشتغ نخناں مں اے بابتا
تئی رواں بیغ وختا گرندا جثہ
گروخ ڈوبر نیاما کھڑوبیثغنت
لانٹ چماں شہ در کپتغنت چیلُکی
چماں ھؤری گوڑتہ مزیں اِڈّھے
پُور در کپتغنت!
آں یہ گرانیں تِلے اَث پہ مئیں خاترا
چوں شمُشی مناں
دانی گیرَنت دِلا!
تو تہ ایکھا شتغئے الاھے بکو؟
مئیں گُرا تو وثی یاد کُل اِشتغنت
تئی گَنڑی
دڑد،
دروشم،
گہیں لعل مئیں
مں وثی سینغئے نیامغا دیثغنت
دانکُرے آ گُرَنت
تئی زھیراں مناں ترونگلی شافثہ
وزّتاں نِندغا وفسغا نئیشتہ
دروشماں ھنگری جان پیلوشتہ
رَکّ ھُژ بیثغنت
دیم دنزاں جثہ
جاں!۔
لِواراں جثہ
دین و دُنیا دوئیں
مں پہ تئی ھاترا
اِشتغنت
مں گو مستاں اوار بیثغاں
آں دِہ وختے اث
کہ
من تو مجلِس کثنت
مست و سمی ئے کِسوّ کثنت آپتا
دانی گیرنت دِلءَ
مست ڈولا مں جھٹے ترا پولثہ
نیٹا لوٹانا دیثؤں ھُذا نشتغا
ھر کسی نیامغا
ھرگیں ٹیڑھے سرا
ھرگیں درشکے بُنا
مں کہ سجدہ کثو سغر زُڑتؤں وثی
زیندئے ھر شئے شمُشتہ مناں آں دما
یک شمُشتغ نئیے لعل تؤ ایکوا
دانی گیرئے دِلا
دانی گیرئے دِلا
غریب ئے زیند
غریب زیند شہ موت جوانیں
نہ اے جہانئیں نہ آں جہانئیں
مخنیں پولا غریب زیندئے
چھڑوئیں ساھے مہ گڑدنئیں نی
بُت اولاکی کار داثی
چھڑو آں زردارئے نوکرے ایں
دِلی مُراذے نہ بیثی پیلوّ
گریویں جراں گو عید بیثی
او
لافئے شوھازا در پہ دریں
ھندے مزوریں ھندے شفانک ایں
ھندے آں زر دارئے مالشی ایں
ھندے آں پہرائے داث کسی
کسے ئے چُکانی وھابروخ ایں
گریب چُکانی زمب گاریں
لوغا تھافغ چڑیث وختے
وختے وفسنت آں لنگھڑیغا
ماث گرے یانا لولیاں داث
پِث شہ ارمانا لوغ کھِلیث
ھُذا یہ ارداسے مئیں گریبی
گریبا اِختر مذئے عزابا
نواں کہ اشتہ دِہ مُنکرء بی
گوں ساڑتیں زمباں کہ لاف پُر کنت
شکُر کَں مولا شی بے نیازئے
چھڑو تئی رحمت امیر پُشتئیں؟
چھڑو تو زردارئے واژھئے چے؟
چھڑو تئی رحمت ھموذ گواری؟
گریب پیدا کُثئے پچے آ؟
اغاں کہ لافا دِہ تو بغاثئی
ترا گوں تھاں چی اَئے نیستی ایں؟
ھمے تئی محبوبئے اُمتی ایں
ھمے کہ زوراخئے زا گِروخیں
شغان بیغِیں ملام بیغیں
پہ لاف رندا
اغاں تو انصافئے بادشاھئے ؟
تہ
ھردوئیناں را براورا دئے۔۔۔