آں
’’زیندھئے مقراریں دگے
اغراراں مُشتغیں انڑدگے
گٹاں راستغاں ہم گرنچیں
گواشاں رستراں سرگواثاں
میشاں میشلاں مہ تاباں
مستاں مہلباں مُرگ پینچ آں
مارکساں مسنداں موسیقاں
ماراں مسواں مسکیفاں
اسراراں عجب رنگیناں
’’عاشق ٹوہو، رائی چاری
ہرچی لکھیا، ہرچی جاری
زیندھ فریمے آسنیں واڑے
زیندھ یہ لکاں بوٹی اے
’’ایذا اختیار مختیار مقراریں
ایذا انّہ و انکار مقراریں
ایذاپاک پلیتی مقراریں
ایذا شاہ و غریبی مقراریں
ایذا یاغی باغی مقراریں‘‘
مں:۔
’’اِنّا‘‘
’’ایذا شینزار مڑدمہ دستایاں
ماہادَہ روغ اختیارے
جبر تہ نبھڑی بہانا اے
انسانیں مزن، وث مختاریں
شاہی ودھغیں اختیارئے
لولاک و جہاں وث محتاجیں
انسانئے گہیں دستانی‘‘
فیصلہ:۔
اے اقرار مقرار جبر اختیار
ازلی ابدی جنجالاں
گنڑتی تفکری سرحالاں
دیرداں چلثہ بحث وگپ
یار مئیں بانسکا وھاوایہ
تتکؤ دوازدہیں جانئے بند
شف جثیں مجلساں وھاواڑتہ
ملگور مئیں ڈوبرا سر لٹاں
چی ئے بٹن آں پشکئیغاں
دستے ایرثی مئیں چکا
لحیفی پاذ مناں پیچنتی
ناغمانی جثئی ٹہکوئے
چو بلّورے کفی فرشارا
ضرور لیوے دوشی ایں گیرآتکئی
پیلاہی جثؤ سارآتکؤں
بُوتے چکثؤں ہوش آتکؤں
باما رنگثؤ حال داثہ
جبر و اختیار گی ایشتہ