Sangat Academy Monthly Sangat Quetta
مرچی یکم مئی اَت، فیکٹری بند اَت، بلے سوالیءَ مرچی ھم کار کنگی اَت، پرچا کہ چندے روچا پد کسانیں ائید اَت،آنہیا پہ نوگلیں چکاں گد و پچ ءَ زیرگا، ابید آئی ئے زرتگیں وامانی مدت ھم نزیک اَت۔ مزن سیٹا گشتگ اَت کہ اگاں تو ھمے ھپتگا واماں مدے۔ من تئی کانتہ ءَ بند کناں۔۔۔۔۔ پوریاگری ئے کانتہ ئے بند کنگ آئی ئے نوگلیں چکانی گٹ ئے دارگے برابر اِنت۔
آ سہبا مہلہ پاد اتکگ اَت، سیاہ چاہ ئے ایربرگا پد تچکابازار ا شت کہ داں انگت بازار انسریتگ اَت۔ آ گوں امیت واریں چماں اسٹاپاگردگا اَت کہ بلکہ کارے برسیت۔
اسٹاپا ٹرکانی رش انت، اے ٹرک درست چہ مزن شہراں اتکگ اَت انت، آئی آیک مستریں ٹرکے چماں کت او شت کہ داں دکان پچ بہ بنت، مردم پوریاگری ئے کنت او وامے سبک تر کنت۔
بام ئے تالان بوھگا گوں اسٹاپا مزنیں سر و پری ءَ سر کش اِت، لہتے مردم اسٹیج جوڈ کنگا اَت او چندے بینر جنگا اَت،کہ آیانی سرا ” یکم مئی لیبر ڈے ” ، “اے دنیا مزدوریگ انت” او پوریاگرانی حق ءَ دگہ دگہ گوشتانک او ٹونک نوشتہ اَت۔
پوریاگریں سوالی پوہ بوھگ ءَ نہ اَت کہ اے چونیں سِر و کپ ئے، بس چمے دکاناں اَت انت کہ کدی آیانی دروازگ توار بکنت۔
نی روچ ءِ رژن برزاد بیتگ اَت، او سوکہ سوکہ دکان پچ بوہان اَت انت،اے ٹرک کہ سوالی آئی تہا وتی چکانی زند ئے بانداتا گندگا اَت، چہ سندھو ڈیھ ئے جلگہیں شہر کراچی آ اتکگ اَت او آرت ئے مزن مزنیں باچکہ (بوری) آں داں کانگّ آں جتگ اَت۔
نو بازار سرجما پچ بیتگ اَت، مزدور ٹرکاں چہ ساماناں ایرگیجان اَت انت، او اسٹاپ ئے سر ا پْر نوں جاکا جیکا بدل بیتگ اَت، سوالی آ دو آرت برتگ اَت، او سیمی انگت آئی بجّان اَت کہ بینر جنوکیں سائیں پراڈہ گاڑی ئے آئی ءَ مان اَتک، آئی شیشگ ھم سیاہ اَت انت۔ اے ٹَکر اگوں سوالی گوں آرتا ھوار سڑک ئے سرا آریا بوت او آئی چمانی دیم ءَ سیائی ءَ مان شانت۔ او بینر جنوکیں گاڑی آ اے کسہ ھچ کمار نہ کت او تچک ءَ جمیتگیں مچی ئے نیمگ ءَ شت۔
ھاموشیں سہتی ءَ پد بے ہوشیں سوالی چار پوریاگر ا بڑ ءَ جتگ اَت اوپہ دیم پہ ہسپتالا جنزگ اَت انت او جلسہ ئے نزیکا بینر جنوکیں سیائیں پراڈوے اوشتوک اَت، سٹیج ئے سرا یک مزن واجہ ءِ ِمزدورانی حقانی بابت ءَ گٹ ءَ زور پر دیگ او گوشتانک دیگا اَت کہ “اے دنیا مزدورئیگ اِنت”۔۔۔ او جہل نشتگیں مچی آزمانا سرا زوران گوں نعریاں آئی پسو ءَ دیان اَت انت۔
